Nibwo yamwambuye iyo myambaro iriho amaraso, aba ariwe uyambara, nawe amwambika iye. Abahozi bahashyitse, nta kindi babajije, bafashe uwo gatozi (bamubwiwe n’imyambaro iriho amaraso) bamwica urupfu rubi mu maso y’umuvandimwe we, bahora uwabo wishwe. Ng’uko uko uwagombaga gupfa yakize, ariko ari uko impongano y’icyaha ibonetse.

Nubwo yari umukiranutsi, Yesu Kristo yapfuye urupfu rubi rwo ku musaraba, igihano cyahabwagwa abanyabyaha ruharwa, abo ab’icyo gihe bitaga ibivume. Bibiliya itubwira iki?

“4. Ni ukuri intimba zacu nizo yishyizeho, imibabaro yacu niyo yikoreye; ariko twebweho twamutekereje nk’uwakubiswe n’Imana, agacumitwa nayo, agahetamishwa n’imibabaro.
5. Nyamara ibicumuro byacu nibyo yacumitiwe, yashenjaguriwe gukiranirwa kwacu; igihano kiduhesha amahoro cyari kuri we, kandi imibyimba ye niyo adukirisha.” (Yesaya 53)

Nguko uko umunyabyaha Baraba yabohowe, umukiranutsi Yesu arabambwa mu cyimbo cye (Matayo 27:15-25). Sinamenye amaherezo ya Baraba, ariko niba ataranakijijwe, ubuzima bwe bwasigaye yabubayemo yibuka uwamubereye inshungu.

Ngicyo icyatumye umwana w’Imana Yesu Kristo amanikwa ku giti, agapfa urupfu rw’abagome. Mbese Imana yaramwangaga? Oya rwose. Ariko umujinya wayo waramukongerejwe, ndetse arataka, ariko Imana imwima amatwi; arababazwa ibi byumvikana mu mubiri w’ababirebaga, ariko Imana imutera umugongo, imwima amaso yayo, kugeza aho atakanye ijwi ry’umubabaro mwinshi ngo:

“Data, Data;
Ni iki kikundekesheje?”
(Matayo 27:46)

Abantu bahereye ku guhana kw’Imana gukabije, bari barishushanyirije mu mitima yabo indi Mana. Bari basigaye bazi Imana y’ingome, itegerwa. Kuyivuga byari biteye ubwoba. Babonaga kandi iyo Mana nk’idakiranuka, kuko yahoraga abana ibyaha bya ba se cyangwa ba sekuru (Kuva 20:5). Hamwe baritotombye bati:

“Ba data bariye inzabibu zirura,
ariko none nitwe dufite ubushagarira mu kanwa.”
(Ezekiyeli 18:2)

Babonaga Imana nk’ingome, ariko nyamara bitewe n’ibyaha byabo (Abalewi 26:14-39). Nibyo! Kuko icyo umuntu abibye aricyo asarura (Abagalatiya 6:7).

Nubwo byari bimeze bityo ariko, Imana ntiyarekaga umuntu burundu rwose. Bibiliya itugaragariza kenshi icyanzu Imana yacaga, kubw’urukundo n’imbabazi byayo, ngo abantu be gushiraho. Urugero turubona mu isezerano yari yarahaye Mose, kuby’Abisirayeli, ati:

“Ariko nubwo bimeze bityo, sinzabata, nibaba mu gihugu cy’ababisha babo; kandi sinzabanga urunuka byatuma mbarimbura pe, nkica isezerano ryanjye nabo, kuko ndi Uwiteka Imana yabo.”
(Abalewi 26:44)

Ahandi muri Bibiliya kandi dusoma ngo:

“22. Imbabazi z’Uwiteka nizo zituma tudashiraho, kuko ibambe rye ritabura. 23. Zihora zunguka uko bukeye, umurava wawe ni munini.” (Amaganya ya Yeremiya 3:22-23)

Kandi by’ukuri Uwiteka ntanezezwa no kubabaza umuntu, cyangwa kumutera agahinda, cyangwa kumureka iteka (Amaganya ya Yeremiya 3:31-33). Keretse ko ibyaha by’abantu aribyo byamwe bituma Imana ibakuraho amaso yayo, kuko idakunda kureba ibyaha (Yesaya 59:1-2).

Muri Bibiliya dusoma ngo:

“Maze abantu banjye bitiriwe izina ryanjye
nibicisha bugufi bagasenga, bagashaka mu maso hanjye
bagahindukira bakareka ingeso zabo mbi;
nuko nanjye nzumva ndi mu ijuru,
mbababarire igicumuro cyabo, mbakirize igihugu.”
(2 Ngoma 7:14)

Nta kindi basabwagwa kugirango babone ineza y’Imana, keretse kuyihindukirira gusa, bakava mu bibi. Nayo yari yarasezeranye kubahundagaza ho imigisha yayo nibayumvira (Gutegeka kwa II 28:1-14), no kwita ku gusenga kwabo nibakora ibyo gukiranuka (Yesaya 58:1-14).

Hari aho yavuze ku Bisirayeli iti:

“Nzabashongesha.”

Kandi iti:

“Ukundi nagenza abantu banjye ni ukuhe?”
(Yeremiya 9:7)

Nubwo abantu bakomezaga gushinja Imana kudakiranuka mu migenzereze yayo (Ezekiyeli 18:25; 33:17), nyamara hari aho yabasabye kuyibwira ikindi yagombaga gukora itakoze, barakibura (Yesaya 5:1-7).

Mu kuri, Uwiteka ntanezezwa no kutubona abantu tubabazwa (Amaganya ya Yeremiya 3:31-33); kuko ari Data.

Yesu rero yigisha abantu gusenga, yashatse no kubavanamo ishusho mbi Satani yari yarashyize mu mitima yabo ko Imana yaba ari ingome. Oya; siko biri. Imana si ingome, ahubwo ni Data udukunda.

Kandi dore, no mu bihe byo kurimbuka gukabije byamwe bihora ku bana b’abantu, si Imana yicaga abantu; ni Satani.

Bibiliya iratubwira ngo:

“Uwo (Satani) yahereye kera kose ari umwicanyi; kandi ntiyahagaze mu by’ukuri, kuko ukuri kutari muri we. Navuga ibinyoma, aravuga iby’ubwe, kuko ari umunyabinyoma, kandi niwe se w’ibinyoma.”
(Yohana 8:44)

Kubera kurakaza Imana kw’abantu, yabakuragaho amaboko yayo n’amaso yayo, maze si ukubarimbagura Satani agasya atanzitse! Abariho urubanza n’abatariho urubanza, abana n’abakuze, abantu n’ibintu, Satani agahindura umuyonga. Maze yarangiza akigira nyoni nyinshi, akagenda akabeshya abantu ati:

- “Imana yanyu irabamaze!”

Kandi ati:

- “Nyamara jyewe nabaha umudendezo n’amahoro!”

Byahe byo kajya! Uwakugize imfubyi yabasha kukubera umubyeyi? Ni ikinyoma gikabije.

Muri ibyo rero, imbabazi z’Imana nizo zabaga nyinshi (na bugingo n’ubu) zigahagarika ubwo bugome bwa Satani, abantu ntibashireho (Amaganya ya Yeremiya 3:22). Niyo mpamvu jye nawe turiho, atari ibyo nta nyoko muntu yari kuba igituye ku isi.

Nuko rero, Imana ni Data. Uko umubyeyi agirira impuhwe umwana we, niko nayo izitugirira (Zaburi 103:13), ndetse kurushaho; kuko iturusha imbabazi. Kandi hari impamvu Imana itugirira izo mpuhwe n’imbabazi bitagira akagero. Ibyaremwe byose, ibyo tubona n’ibyo tutabona, byabayeho ku itegeko ry’Imana. Yarategetse gusa ngo nibibeho, ku itegeko ry’Ijambo ryayo, bibaho (Itangiriro 1:1-31). Ariko ku mwana w’umuntu ho, yamubumbishije intoki zayo, irangije, nk’aho bidahagije, imuhumekeramo umwuka wayo abona kuba ubugingo buzima (Itangiriro 2:7).

Mu muntu rero harimo ubumana; Imana iretse umuntu, yaba irekeye Satani icyo gice cy’ubumana kiri mu muntu, niwo Mwuka wayo. Mbese hari uwakanga ino rye? Iyo rirwaye agasebe gato gute ntabona amahoro aruko katakiriho? Umwanzuro wo guca iryo no burundu kubera indwara nka kanseri uza nyuma bigaragara ko nta kindi kigishobotse gukorwa ngo iryo no rikizwe. Uko niko bimeze ku Mana n’umuntu. Nk’uko bitari umunezero ku muntu kurwara ino yewe no kubona ricibwa, niko bitari umunezero namba ku Mana kubona umuntu ababazwa kimwe no kurimbuka (Ezekiyeli 18:32; 33:11).

Nk’uko umwana ahuzwa n’ababyeyi n’amaraso ye, niko natwe duhuzwa n’Imana n’umwuka wayo yaduhumekeyemo. Ni Data rero. Kandi ni Data kuruta uko ba data b’umubiri batubera (Zaburi 27:10); ni umubyeyi wacu kuruta ba mama (Yesaya 49:15-16).

Imana ni Data; kandi byumve neza:

“Ni Data wa twese.”

Ntihakagire ubigukuramo! Uko uri kose: ni So. Bibiliya irakubwira ngo “Ni ‘So wo mu ijuru’” (Matayo 7:11). Uzi abo bantu Bibiliya ibwira ngo ‘So wo mu ijuru’? Yesu yari yabanje kuvuga ibyabo neza, mbere yo kubahishurira uko kuri kundi, ati:

"Ko muri babi [...]"
(Matayo 7:11)

Nuko rero, ni Data wa twese (Abefeso 3:14-15).

Ahari bamwe bazakubwira ngo:

- “Ntabwo ari So!”

Kubera impamvu izi n’izi. Ntukabumvire! Ni So. Mbese umwana w’ikirara mu bukene butagira akagero, hari uwagatekereje ko yari afite se w’umutunzi bitagereranywa (Luka 15:11-24)?

Abamubonye aragiye ingurube, uretse abari bamuzi, ntibabashaga kwemera ko afite se w’umukire kandi w’umunyabuntu busaga.

Kuba mu mibereho mibi atiyumvishaga ukuntu yarindagiye kugeza asohoye muri ubwo buzima, byatumye agera aho yemera mu mutima we rwose ko bitamukwiriye kwitwa umwana mu rugo kwa se. Kandi koko, kuko n’abagaragu ise yari atungishije ibye bari mu buzima bwiza kumuruta kure, bubahitse kandi bafite agaciro ku kigero gisumbye icye inshuro nyinshi.

Aho afatiye icyemezo cyo gusubira kwa se, yanzuye mu mutima we icyo azamwisabira:

“Ntibikinkwiriye kwitwa umwana wawe,
mpaka mbe nk’umugaragu wawe.”
(Luka 15:19)

Kandi nabwo yari kumva anyuzwe, agahorana umwenda wo gushimira uwo shebuja mushya kuko yari kumurutira bose bamuhatse mbere. Mbese se yaramwemereye? Oya! Ahubwo yaramuhobeye, aramusoma, kuko yari akiri umwana we, nubwo byari bimeze bityo.

Nawe, nubwo Satani ajya akuragiza ingurube z’uburyo butari bumwe, wisubiyemo ukagaruka ku Mana So, ukihana uti “nacumuye mu maso yawe, mpaka gusa mbe umugaragu wawe”; urukundo rwayo rwa kibyeyi rwakwakira, kandi ukumva ijwi riguhumuriza riti “mwana wanjye”. Iryo jwi nararyumvise umunsi nemerera Imana mu bugingo bwanjye, kandi abantu amamiliyoni n’amamiliyoni bararyumvise muri bo bamaze kuyiha uko bari; nawe ubasha kuryumva rero.

Nibyo! Ni so, nubwo abandi batabyemera; ariko wowe bimenye kandi ubyibwire muri wowe, ubyisubiriremo kenshi uti: “Ni Data”.

Takira Imana hamwe na Yesaya uti:

“Erega ni wowe Data wa twese,
nubwo Aburahamu atatuzi, Isirayeli ntatwemere.”
(Yesaya 63:16)

Ni Data wa twese, nawe urimo. Ndetse kuri ubu, ushobora no gutangira kumuhamagara uti:

- “Data, Data, Data”.

Ni So! Wigendana igihunga kwa So! Za gusa wicishije bugufi, mu cyubahiro cyose umwana agomba umubyeyi we, uze witeguye guhindukira no kugendera mu nzira yose akuyoboyemo; nawe uzibonera uburyo urukundo rwe rutagira akagero, n’ineza ye itarondoreka. Kandi uzabona uburuhukiro bwo mu mutima (Matayo 11:29).

Kandi, byumve:

“Imana si umuntu ngo ibeshye,
kandi si umwana w’umuntu ngo yicuze.
Ibyo yavuze, no kubikora irabikora;
ibyavuye mu kanwa kayo, no gusohoza irabisohoza.”
(Kubara 23:19)

Niyo yivugiye ko ari So, ibyandikisha mu gitabo cyayo Bibiliya ngo bibe isezerano ridakuka n’umwigisha wawe ibihe n’ibihe (2 Timoteyo 3:16), ihoza umutima kuri iryo jambo (Zaburi 105:8) kandi ubwayo iraririnda (Yeremiya 1:12) ngo risohore nk’uko yavuze muri ryo (Luka 21:33; Yesaya 55:10-11) kandi nawe ikurindira kugira ngo uzahure naryo mu gihe nk’iki. Nibyo!

Ubashije gukurikirana amateka y’ukuntu Bibiliya yavutse mu myaka myinshi kandi yanditswe n’abantu b’ibihe n’imibereho y’ubuzima bitandukanye, ukamenya ukuntu abami n’ibikomangoma bo mu bihe byayikurikiye bayirwanyije bagambiriye kuyitsembaho burundu, wasobanukirwa ukuntu ukuboko kw’Imana ari ko kwayirinze gusa; naho ubundi inkuru yayo ntayo uba wumva ubu. Ariko dore bose bayirwanije bashiranye n’ibihe byabo, nyamara yo igumaho amasekuruza n’amasekuruza; kuko ibitse ijambo ry’Imana ryagenewe ab’ibihe byose, nawe urimo.

Ni Imana ya Aburahamu, Isaka na Yakobo; ni Imana ya Eliya n’abandi bahanuzi, ariko ni n’Imana yawe. Ikigeretse ku ibyo, ni Se w’Umwami wacu Yesu Kristo, ariko kandi ni So, nawe; upfa kubyizera gusa (Yohana 1:12). Nuko rero, ushobora gutangira kwegera Imana nk’uwegera se, no kuyiringira kuri byose.

Bibiliya irakubwira ngo:

“Ni wizera,
urabona ubwiza bw’Imana.”
(Yohana 11:40)

Nuko rero, we kuba utizera, ahubwo ube uwizera (Matayo 20:27); kandi niwumvira, uzahirwa.

Nubwo Imana nta kindi yakongeraho, kuba yarakugize umuntu ntikugire ihene barya cyangwa igiti batema, ikakugira umuntu, ukwiye kubiyishimira. Ariko ubundi Imana iguhitishijemo kuba itungo, wahitamo kuba irihe? Nzi neza ko utakemera rwose. None ntiwumva ukuntu kuba uri umuntu ari ikintu gikomeye cy’ubuntu yakugiriye, nta ruhare ubigizemo? Mu kuri, ukwiye kuyishimira.

Umwe mu bami bo mu Isirayeli witwaga Dawidi wari waragiriwe ubuntu bwo kubitahura, yabiririmbye mu ndirimbo agira ati:

“Ndagushimiye, Uwiteka,
ko wandemye uburyo butangaje.”
(Zaburi 139:14)

Ariko kandi (Dawidi) yisubiyemo akimenya ko ntacyo aricyo cyo kwikuza imbere y’umuremyi n’ibindi yaremye, ntiyibona ahubwo arushaho guca bugufi; maze abivuga mu ndirimbo ze, ati:

“Iyo nitegereje isanzure ry’ijuru, umurimo w’intoki zawe;
umuntu ni iki ko umwibuka, cyangwa umwana w’umuntu ko umugenderera?”
(Zaburi 8:4-5)

Ariko kandi na none, dufite inyungu mu kubaha Imana kwacu. Ushaka iminisi myiza? Ubaha Imana (Gutegeka kwa II 28:1-15). Nibyo! Kuko dusoma muri Bibiliya aya magambo ngo:

“Maze ibwira umuntu iti:
Dore kubaha Uwiteka nibwo bwenge,
kandi kuva mu byaha niko kujijuka.”
(Yobu 28:28)

Kandi ahandi dusoma ngo:

“Kuko ababi bazarimburwa ku isi,
ariko abiringira Uwiteka bazaragwa igihugu.”
(Zaburi 37:9)

Ahandi naho dusoma ngo:

“10. Ushaka gukunda ubugingo, no kubona iminsi myiza, abuze ururimi rwe rutavuga ikibi, n’iminwa ye itavuga iby’uburiganya.
11. Kandi azibukire ibibi, akore ibyiza, ashake amahoro, ayakurikire, kugira ngo ayashyikire.
12. Kuko amaso y’uwiteka ari kubakiranutsi, n’amatwi ye ari kubyo basaba. Ariko igitsure cy’Uwiteka kiri ku nkozi z’ibibi.” (1 Petero 3)

Urabyumva? Ijisho rye riri ku bakiranutsi, n’ugutwi kwe gutegewe kumva ibyo basaba; ariko igitsure cye nacyo kiri ku nkozi z’ibibi, zose. Kandi, mu kuri, biteye ubwoba gusumirwa n’amaboko y’Uwiteka (Abaheburayo 10:31). Birimo umumaro kubaha Imana; ariko kandi binafite ingaruka mbi kwihindura umwanzi wayo.

Ushaka gucika ku isi? Suzugura Imana, unayirwanye (Gutegeka kwa II 28:15-68; Zaburi 37:9-10). Ubwayo yaravuze iti:

“Icyubahiro cyanjye sinzagiha undi,
n’ishimwe ryanjye sinzariha ibishushanyo bibajwe.”
(Yesaya 42:8; 47:11)

Icyubahiro cyayo igikomeyeho rero! Irakiburana, kandi ikanakirwanirira. Uwubaha Imana nayo izamwubahisha, ariko uyisuzugura nawe azasuzugurwa; niko biri. Ubwayo yarabihamije mu ijambo ryayo iti:

“Kuko abanyubaha ari bo nzubaha,
ariko abansuzugura bazasuzugurwa.”
(Hoseya 4:6)

Kandi ga buri mubyeyi wese akunda umwana we umwubaha, akamukorera. Na Data Imana niko amerera abantu bamwubaha (Malaki 3:17).

Yesu ati:

“Izina ryawe ryubahwe.”

Bagenzi, izina ry’Imana ni iryo kubahwa rwose. Niryo dukesha kubaho. Duhumeka umwuka w’Imana ku buntu, tukagendagenda ku isi yayo nta kiguzi. Habayeho kwishyuzwa ibyo gusa, ni bangahe babona ubwishyu? Ubundi se wayishyura ibyayo? Kuko ubutunzi bwose abantu biratana babusanze mu isi y’Imana. Bavuka bambaye ubusa gusa. Bityo rero, nta wabona icyo kwishyura. Hejuru y’ibyo, Imana igusha imvura ku buntu, abahinzi bakeza. Izuba naryo riva ku buntu, rigasusurutsa ibyaremwe byishwe n’umwijima n’imbeho by’ijoro. Iryo joro naryo Imana yarishyizeho ku buntu, ngo mwene muntu aruhuke; ku badashoboye kuruhuka muri ryo, ishyiraho ukwezi ko kubamurikira, byose ku buntu. Mbese koko iyo Mana si iyo kubahwa?

Yesu ati:

"(...) mujye muvuga ngo: '(...) Izina ryawe ryubahwe'.”
(Luka 11:2)

Kandi ati:

“(...) Ubwami bwawe nibuze.”
(Luka 11:2)

Imana irema isi, yari nziza cyane. Harimo ibiti byera imbuto z’amoko atandukanye, abantu bagatungwa no kurya imbuto gusa, nta yindi miruho bategetswe gucamo ngo bakunde babeho. Ndibwira ko imibu yo muri Edeni itateraga indwara, kandi ko intare n’ingwe byaho biticaga abantu (Itangiriro 2:8-17). Nyamara icyaha kije mu isi, Adamu na Eva bamaze gucumura, ibintu byahindutse buri munsi (Itangiriro 3:1-19). Isi yameze ibitovu n’urwiri mu mwanya w’ibiti biribwa, inyamaswa zitandukanye zigirira umuntu ubukana, indwara n’urupfu bibona icyuho kandi byiha icyanya mu mubiri w’umuntu. Isi yahise iba mbi rwose, ndetse n’abantu ubwabo baba babi mu buryo bahindukirana kurwanyana no kumaranaho. Sibwo ubuzima bwo mu isi buhindutse intambara (Yobu 7:1)!

Nubwo bimeze bityo ariko, hariho isezerano ryiza ry’Imana ry’uko iyi Si izongera guhindurwa Paradizo, iyo gukiranuka kuzabamo (2 Petero 3:13); kandi ibyo bizasohora, ku ngoma ya Mesiya.

Ku ngoma ya Mesiya, hazabaho amahoro, umunezero, ibyishimo by’iteka. Nta ndwara, nta ntambara, nta bwire, nta rupfu, nta nzara, nta bukene, nta kurenganywa; kubivuga mu magambo macye, hazaba ari mu mahoro atemba nk’uruzi, kandi ibyaremwe byose bizagira umugabane muri ayo mahoro. Bibiliya itubwira iki?

“5. Icyo gihe impumyi zizahumuka, n’ibipfamatwi bizazibuka.
6. Icyo gihe ikirema kizasimbuka nk’imparage, ururimi rw’ikiragi ruzaririmba: kuko amazi azadudubiriza mu butayu, imigezi igatembera mu kidaturwa.
7. Kandi umusenyi wotsa utera ibishashi uzahinduka ikidendezi, n’umutarwe uzahinduka amasoko; mu ikutiro ry’ingunzu, aho zaryamaga, hazaba ubwatsi, n’uruberanya, n’urufunzo.
8. Kandi hazabayo inzira nyabagendwa, iyo nzira izitwa inzira yo kwera. Abanduye imitima ntibazayicamo, ahubwo izaba iya babandi. Abagenzi naho baba ari abaswa ntibazayiyoba.
9. Nta ntare izahaba, inyamaswa yose y’inkazi ntizayigeramo, ntibizayibonekamo; ahubwo abacunguwe nibo bazayinyuramo.
10. Abacunguwe n’Uwiteka bazagaruka, bagere i Siyoni baririrmba; ibyishimo bihoraho bizaba kuri bo, bazabona umunezero n’ibyishimo; kandi umubabaro no gusuhuza umutima bizahunga.” (Yesaya 35)

Mu kuri, hazabaho isi nshya, iyo kurira no gutaka bitazabamo ukundi, kuko ibya mbere bizaba bishize (Ibyahishuwe 21:4).

Wari uzi n’ikindi? Ngo umwana w’intama n’umugunzu w’intare, muri ubwo bwami, ngo bizarishanya mu rwuri rumwe, umwana muto ariwe ubiragiye (Yesaya 11:6)!

Ku ngoma ya Mesiya, isi izaba ahantu heza ho kwifuzwa rwose, aho umwana w’umuntu azahora ashimira Imana impano nziza y’ubuzima yamuhaye; kuko ibya mbere bibabaza bizaba bishize (Ibyahishuwe 21:4-5).

Ubwo bwami Yesu yabuhishiye abamukunda (Luka 22:28), kandi yagiye mu ijuru kubutegura; igihe gikwiriye gishyitse, azagaruka kujyana abamwizeye, bibanire muri ubwo bwami bw’amahoro adashira (Yohana 14:3).

Umwe niwe waririmbye ati:

“Abasigiye ibyabo gukurikira Yesu
Bagatinyuka ibyago bizeye umusaraba
Bakiyambura byose bibabaza umukiza
Abo nibo bazaba i Siyoni.”

Kandi ati:

“Siyoni iriho.”

Igihe ubwami bw’Imana butarahishurwa ku mugaragaro, ababwifuza bakabusaba, kandi bakabushakana umutima wabo wose (Yeremiya 19:13), bujya buza kuba mu mitima yabo. Nibyo! Bagira amahoro yo mu mutima.

Kimwe n’abandi bantu, banyura mu makuba n’imiruho byo ku rugamba rw’ubu buzima, ndetse hakaba ubwo isi ibigirijeho nkana (Abaheburayo 11:35-38); ariko kandi muri byose bagiraga ibyiringiro ku Mana.

Ni mu bisa n’ibyo Paulo yahamije ati:

“8. Dufite amakuba impande zose, ariko ntidukuka imitima; turashobewe, ariko ntitwihebye;
9. turarenganywa, ariko ntiduhanwa; dukubitwa hasi, ariko ntidutsindwa rwose.” (2 Abakorinto 4)

Ibi byose babibashishwa n’uko ubwami bw’Imana buri mu mitima yabo. Ibigoye benshi, nuko batuye kure y’ubwami bw’Imana.

Ariko uyu munsi, ubasha guhamagara mu ijuru uti:

“(...) Data wa twese uri mu ijuru,
Izina ryawe ryubahwe, Ubwami bwawe buze.”
(Matayo 6:9-10)

Ubwami bw’Imana nibuza, hari igikoreka ku bibazo byawe. Amaganya arashira, nta gushidikanya. Ubwoba nabwo burahunga, abadayimoni baratsindwa buheriheri. Indwara zakumugaje zirakira, n’ibyaha bikunesha biranesheka. Ubwami bw’Imana nibuza mu mutima wawe, umugezi w’amahoro menshi y’amazi y’ubugingo uratemba muri wowe, nk’uko ibyanditswe bivugwa (Yohana 7:37-38).

Uraba uhagaze kuri iyi Si mu mubiri, nyamara mu bugingo bwawe waratangiye kuba mu yindi Si abizera bazajya kubamo vuba aha: ni ryo banga ry’ubwenegihugu bubiri.

Mana, ubwami bwawe nibuze.

Gusa, ntibubana n’ibyaha, kandi ntibwifatanya n’imigambi mibi. Itandukanye n’ibikurega bikubuza kwegera Imana no kwemerwa nayo, ubundi utangire gusaba ubwo bwami bw’Imana kuza muri wowe; kandi buraza nta kabuza.

Ubwayo yaravuze iti:

“Ko muri babi, kandi mukaba muzi guha abana banyu ibyiza; none So wo mu ijuru ntazarushaho guha ibyiza ababimusabye?”
(Matayo 7:11)

Ijambo ry’Imana kandi riraguhamiriza riti:

“Nimuguma muri jye,
amagambo yanjye akaguma muri mwe,
musabe icyo mushaka cyose, muzagihabwa.”
(Yohana 15:7)

Mbese urifuza ubwami bw’Imana mu bugingo bwawe, ngo ubone amahoro n’umunezero iyi Si n’abategeka bayo badashobora kukwaka? Humiriza amaso y’umubiri, mu kwizera uzamukane umutwaro w’ibikugora byose bikakuremerera, ntusige n’ibyaha n’ibicumuro byawe, ubizane imbere ya Yesu Kristo aho yicaye mu ijuru iburyo bw’Imana Se ku ntebe y’imbabazi; umutakire uti:

“Mwami, ngirira impuhwe,
unture uyu mutwaro, umpindure mushya;
kandi ku bw’ubuntu bwawe,
ubwami bwawe buze muri jye.”

Kandi ntushidikanye, kuko Yesu Kristo yahawe ubutware mu isi bwo kubabarira abantu ibyaha (Matayo 9:6).

Yiteguye kukumva no kugusubiza, kuko we ubwe yavuze ati:

“Uza aho ndi, sinzamwirukana na hato.”
(Yohana 6:37)

Umunsi umwe, Mose yagize icyifuzo ku Mana. Yari yagize umugisha mwinshi, aganira n’Imana nk’abareshya. Si ukuyibwira, yimarayo; si ukuyisaba, ntiyisigira na kimwe. Umva uko Bibiliya ibivuga.

“12. Mose abwira Uwiteka ati: ‘Dore ujya untegeka uti -jyana ubu bwoko-; ntumenyeshe uwo udutumanye. Ariko waravuze uti –nkuzi izina, kandi wangiriyeho umugisha-.
12. Nuko niba nkugiriyeho umugisha koko, nyereka imigambi yawe, kugirango nkumenye, mbone uko ndushaho kukugiriraho umugisha: kandi wibuke yuko ubu bwoko ari ubwawe.’
13. Aramusubiza ati: ‘ubwanjye nzajyana nawe, nkuruhure.’
14. Mose aramubwira ati: ‘ubwawe nutajyana natwe, ntudukure ino.’
15. Ikizamenyekanya yuko jye n’ubwoko bwawe twakugiriyeho umugisha ni iki? Suko ujyana natwe, bigatuma jye n’ubwoko bwawe dutandukanywa n’amahanga yose yo mu isi?
16. Uwiteka abwira Mose ati: ‘N’icyo uvuze icyo, ndagikora; kuko wangiriyeho umugisha, nkakumenya izina.’
17. Aramubwira ati: ‘Nyereka ubwiza bwawe burabagirana.’
18. Uwiteka aramubwira ati: ‘ubwanjye nzanyuza kugira neza kwanjye kose imbere yawe, nzivugira mu izina imbere yawe ko ndi Uwiteka; kandi nzagirira ubuntu uwo nzagirira ubuntu, kandi nzababarira uwo nzababarira.’
19. Kandi ati: ‘Ntiwareba mu maso hanjye, kuko umuntu atandeba mu maso ngo abeho.’
20. Kandi Uwiteka ati: ‘Hariho ahantu bugufi bwanjye, nawe uzahagarare ku rutare;
21. Kandi ubwiza bwanjye bukikunyuraho, nzagushyira mu busate bw’igitare, ngutwikirize ikiganza cyanjye, ngeze aho marira kunyuraho;
22. Maze ngutwikurureho ikiganza cyanjye, urebe mu mugongo hanjye, ariko mu maso hanjye ntihaboneka.” (Kuva 33)

Nguwo Mose, umutoni w’Imana, no kwifuza kwiza kwe.

Ati:

- “Mana, nyereka ubwiza bwawe burabagirana.”

Ni iki Imana itari yamwemereye? Asabye kimwe, aragihawe. Asabye n’ikindi, Uwiteka ati:

- “N’icyo uvuze icyo ndagikora, kuko wangiriyeho umugisha, nkakumenya izina.”

Mu rupapuro rw’inzira rwitwa “kuko wangiriyeho umugisha, nkakumenya mu izina”, nihe utajya? Ni iki utasaba? Keretse icyo udakennye, kuko waba wizeye iki gisubizo:

- “N’icyo uvuze icyo ndagikora, kuko wangiriyeho umugisha, nkakumenya mu izina.”

Mose nawe rero ntiyapfushije ako kanya ubusa, ati:

- “Burya ngukunda, nkakugandukira ntakuzi; nyereka ubwiza bwawe burabagirana.”

Ee! Hari ahantu byakoze Imana. Mbese ugira ngo byari biyinaniye kuvuga iti: “n’icyo uvuze icyo ndagikora, kuko wangiriyeho umugisha, nkakumenya izina”? Yari ibishoboye rwose; mu kunezeza umukozi wayo wayigiriyeho umugisha, ikamumenya izina. Kandi cyari n’icyifuzo cyiza: kumenya ikuzi, kureba ikureba. Mbese wowe ubwo buntu ntiwabwifuza? Nawe ukagira icyivugo ugendana nka Pahulo, aho yagize ati:

“Nzi umuntu wo muri Kristo, wazamuwe, akajyanwa mu ijuru rya gatatu,
akerekwa ubwiza bw’Imana burabagirana;
niba yari mu mubiri, cyangwa mu mwuka, simbizi.”
(2 Abakorinto 12:2-6)

Mbega ubuntu butangaje waba ugiriwe! Hehe no kuzongera gushidikanya ko iriho! Kandi warayiboneye, atari iyo wabwiwe! N’aho ibitangaza byaba bitagikoreka, nta waguhendesha ibidafadika by’iyi Si ishira, ngo akwemeze ko Imana itabaho; icyo waba warakirenze bidasubirwaho. Rwose, nanjye nakifuza kugirirwa ibimeze bityo.

Mu maso y’abizera rero, Mose yasabye ikintu cyiza. N’iyo akibwira Abisirayeli bose icyifuzo cye, bari kugifatanya, bakagihindura rusange. Uretse ko binashoboka ko bari bagitunze muri bo, keretse ko batari barayigiriyeho umugisha wo kwivuganira imbona nkubone nka Mose. Kuko igihe Imana ibahera amategeko ku musozi wa Sinayi, gutigita kwawo no guhinda kw’inkuba bumvise iyo Mana itaranavuga, ndibwira, byabateye guhara icyifuzo cyabo bataranagitambutsa (Kuva 20:18-19; Gutegeka kwa II 5:23-27).

Nyamara dore, mu maso y’Imana, Mose yari arengereye, asaba ikintu kitari cyiza na mba. Kuki? Kuko Mose yari yisabiye urupfu, atabizi. Mbese we yari yiteguye gupfa? Yakamenye mbere icyo ibyo bisobanuye, aho yari gukomeza icyifuzo cye, akabumbura akanwa ke, agasaba? Benshi bafatira ikiganza ku munwa, ngo iryo jambo ritabacika.

Imana nayo kandi yari igifite byinshi byo kumukoresha, kandi yari itaratunganya neza uwo kumusimbura, ngo abe yuzuye, ari umugabo nyamugabo wo guhamya iby’Imana imbere y’abameze nka Farawo, cyangwa ngo abe umugabo ushyitse wo gutsinda imiyaga yose y’imyumvire n’imyigishirize (Abefeso 4:13-14).

“[…] kuko wangiriyeho umugisha,
nzanyuza kugira neza kwanjye kose imbere yawe […].
Ntiwareba mu maso hanjye,
kuko umuntu atandeba mu maso ngo abeho.”

Ndizigira ko Mose yasobanukiwe, akamenya ko yari atambukije icyifuzo cy’ubwana, biti ihi se cy’ubupfu n’ubusazi. Ese iyo Imana yicecekera, ntimuhe icyo yasabye, ntinamubwire impamvu; aho uyu muntu w’Imana yari gukomeza gukora umurimo wayo anezerewe? Abayikorera nibo batanga ubuhamya bw’uko bijya bibagendekera mu gihe gisa nk’icyo.

Ni mu neza ya Mose rero, n’iy’Abisirayeli, byatumye Imana idasubiza kwifuza kwa Mose; nubwo byagaragariraga bose gute ko ari icyifuzo cyiza. Mose yari azi ko yifuje neza, nicyo cyatumye asaba; Imana yari izi ko Mose asabye ikitari cyiza, nicyo cyatumye itamusubiza.

Reka nguhe icyitegererezo cy’ineza y’Imana mu byiza ikwima wowe.

Nzi umuryango mu Rwanda (umusaza n’umukecuru) barokotse jenoside yahabaye mu 1994, ariko isiga ibahinduye nk’agati ko mu ruzi; abana babo bose n’ababakomokaho nta n’umwe yasize. Kandi abo bakirirahato bari baramaze guca imbyaro, nta bundi buryo bwo kongera kubona umwana. Mbega umubabaro wabo ugira igipimo? Mu bisa nk’ibi, ingumba itarigeze ishyira imugongo ibarusha guhirwa; ariko nyamara ibihe n’ibihe nayo yifuzaga umunezero wabo wo kuba bafite abana n’abuzukuru, igihe cyose bari babafite.

Uyu musaza n’uyu mucyecuru bakomeje kubaho, bategereje umunsi wabo wo gucyura igihe kuri uru rugerero rw’ubuzima; ariko ibihe byose nabamenye nyuma y’ibyo, sinigeze mbabona bakeye ku maso n’umunsi n’umwe. Kandi ndabumva rwose; kuko iyo ngerageje kwishyira mu mwanya wabo neza, ndatakara rwose; simenye umwifato nakifata, simbone icyanzanira kunezerwa kindi muri ubu buzima.

Kubw’ibyo, hari abo Imana yimye urubyaro ibarinda intimba batakihanganira itajya ibura gucumita imitima y’ababyaye mu gihe cyo gupfusha. Si iyo bigeze ku bazapfusha ababo batagize n’urwibutso basiga nk’uko byagendekeye uyu musaza n’uyu mucyecuru; kandi dore ibikombe nk’ibyo biri imbere y’abahawe ubu buzima bishaka ababinyweraho. Amahitamo aje hagati yo kubyara abo uzarenzaho ubutaka nta n’urwibutso basize cyangwa kutigera uterura uwo mu ruho wo guhekera ubusa, wahitamo iki? Ndabizi, biragoye guhitamo.

Umuririmbyi umwe niwe wabihamije, ati:

“(Yesu) Araza gushyiraho inzira %
Areba kure aho ntabasha kurora;
Nzahora mwiringira.”

Nibyo! Areba kure, aho ntabasha kurora, akamenyera ibyiza binkwiriye kandi binzanira amahoro akabimpera ubuntu, akamenya ibyo kumbabaza no kunaniza ntakunde mbibona, nubwo nabishakana umuhati n’amarira bimeze bite.

Kuby’uriya musaza n’umukecuru we, n’abandi nkabo isi yigirizaho nkana, wakibaza uti:

- “Mbese Imana irabanga?”

Oya rwose. Kuko nubwo biba bibonwa bimeze bityo, hari benshi muri ubu buzima bafiteho isumbwe, ku buryo nabo batakwemerera ubaye uwabahitishamo kugurana nabo imisaraba yabo yo muri ubu buzima. Kandi menya iki: ari uwo musaza n’umukecuru we (n’abandi bose banywera ku gikombe nk’icyabo), ari n’abo bandi nabo bakubititse biri inyuma y’ibyabo, buri wese ashoboye igishakwe cye.

Kuko mu ijambo ry’Imana dusoma ngo:

“Nta kigeragezo kibasha kubageraho kitari urusange mu bantu; kandi Imana ni iyo kwizerwa, kuko itazabakundira kugeragezwa ibiruta ibyo mushobora, ahubwo hamwe n’ikibagerageza izabacira akanzu, kugira ngo mubone uko mubasha kucyihanganira.”
(1 Abakorinto 10:13)

Urabyumva? Ngo ni rusange; ni ukuvuga ko hari abandi benshi mu ndimi zose no mu moko yose bari ku rugamba nk’urwawe. Ikindi ariko, ngo:

“Ntizabakundira
mugeragezwa ibiruta ibyo mushobora.”

Abiyahura kubera ibikomeye bari kunyuramo ni Satani aba yabashutse abumvisha ko badashoboye kubyihanganira, akabagira inama mbi yo guta urugamba rw’ubuzima.

Kandi byo ndagira ngo wumve ubu buzima n’ibibazo byabwo nk’urugamba; kandi niko biri. Muri Bibiliya dusoma ngo:

“Iyo umuntu akiri mu isi,
aba ameze nk’ufashe igihe mu ntambara.”
(Yobu 7:1)

Mu ntambara, umugaba w’ingabo niwe ujyena aho zirwanira n’ibikoresho zirwanisha, akurikije ubushobozi bwa buri mutwe n’abawugize. Hari abarwanira mu mashyamba no mu bihuru, nyamara kandi hari n’abarwanira mu mijyi no mu mayira. Hari abarwanira ku butaka cyangwa mu mazi, hari n’abarwanira mu kirere. Hari abarwana intambara y’ibikorwa, ariko hari n’abarwana iy’amagambo.

Ku rugamba kandi, intwaro zose ntizikora; hari ahakoreshwa ibitwaro bya rutura, hari n’ahakoreshwa intwaro ntoya. Haba n’ubwo bibayeho ko intwaro zose zidashobora gukirisha umuntu kuko zibuze cyangwa zitagishoboye kuri bene urwo rugamba, umusilikari akaba agomba kurwanisha ingingo ze z’umubiri, ubwenge n’umutima.

Muri ibyo bice by’urugamba n’imibereho yo muri rwo itandukanye, buri hose umusilikari uharwanira ahababarira mu buryo bwihariye. Abarwanira mu bihuru babasha kuhagirira amakuba y’imbeho, imibu n’inyamaswa z’inkazi, ariko abarwanira mu mayira nabo ntibarinzwe akaga k’izuba n’umwanzi wiyoberanyije niba bagomba kwirinda ibyaha byo mu ntambara.

Kandi umusilikari urwanira mu bihuru yakifuza kuba mu mutwe w’abarwanira mu mijyi, ariko dore si ibye guhitamo aho yoherezwa. Nyamara kandi akwiye no kumenya no kwemera ibi: aho adashaka kuba, hagomba uhaba; kuki ataba we, ahubwo akaba undi? Uwahamwohereje afite kandi azi impamvu ze; icy’umusilikari ni ukurangiza inshingano ze mu buryo buzamuhesha ikamba urugamba rurangiye, yaba yararuhonotse cyangwa yararuguyeho. Pahulo aha Timoteyo icyitegererezo cy’abasilikari ku rugamba rw’umurimo w’Imana yariho, yaramubwiye ati:

“Ntawaba umusilikari, kandi ngo yishyire mu by’ubu bugingo, ngo abe akinejeje uwamwandikiye ubusilikari.”
(2 Timoteyo 2:14)

Kandi ati:

“Zirikana ibyo mvuze,
kuko umwami wacu azaguha ubwenge muri byose.”
(2 Timoteyo 2:7)

Bitandukanye n’abagaba b’igisilikari cyo mu isi, uwatwandikiye icyo ku rugamba rw’ubu buzima yasezeranye kubana natwe ku rugerero, no kudutabara. Yaravuze ati:

“Sinzagusiga na hato, kandi ntabwo nzaguhana na hato.”
(Abaheburayo 13:5; Yosuwa 1:5)

Arongera ati:

“Ntabaza ndagutabara, nkwereke ibikomeye biruhije utamenya.”
(Yeremiya 33:3)

Kandi ati:

“Kandi dore ndi kumwe namwe iminsi yose, kugeza ku mperuka y’isi.”
(Matayo 28:20)

Nkubwire se uko Dawidi yabonye Imana?

Ati:

“Imana niyo buhungiro bwacu n’imbaraga zacu, ni umufasha utabura kuboneka mu byago no mu makuba.”
(Zaburi 46:1)

Kandi ati:

“13. Nk’uko se w’abana abagirira ibambe, niko Uwiteka agirira abamwubaha;
14. kuko azi imiremerwe yacu, yibuka ko turi umukungugu.” (Zaburi 103)

Imana ubwayo yavugiye mu kanwa k’umuhanuzi Yesaya iti:

“Ntutinye, kuko ndi kumwe nawe; ntukihebe, kuko ndi Imana yawe.”
(Yesaya 41:10)

Kandi muri uwo murongo, mu isezerano ku bayizera bose yabwiye Yosuwa iti:

“Ntutinye, kandi ntukuke umutima; kuko Uwiteka Imana yawe iri kumwe nawe aho uzajya hose.”
(Yosuwa 1:9)

Umwe wari waramenye kandi akiragiza Imana niwe waririmbye ati:

“Nyura mu misozi, nyura mu mataba;
Aho hose niko harushya umutima
Njya nsaba Uwiteka kugirango amfashe;
Uwiteka nawe ntatinda kunyumva.”

Urugamba rw’ubuzima byo, by’ukuri ntuzarurindwa; kandi uzarwana urwo uwaguhaye ubuzima yaguhitiyemo. Ariko nirukomera, inzira ikaboneka nk’irambye cyangwa itagaragara, ukwiye kwibwira ibi:

Icya mbere: ibyo ugeragezwamo ntibirenze ibyo ubasha (1 Abakorinto 10:13); urabibasha. Wowe komeza ugende gusa, wirebere agakiza Uwiteka azakuzanira mu gihe gikwiriye (Kuva 14:13-14). Cyane ko bwira bugacya, umunsi twaruhiragamo ugatambuka. Igihe cyose bukira bugacya, hari ibyiringiro mu munsi w’ejo. Kandi nk’ukw’abaca imigani babivuga, by’ukuri, “iminsi y’inzara ishirira mu kuburara”. Hejuru y’ibyo kandi, "nta joro ridacya, kandi nta mvura idahita"; n’iryo rikugose rizacya, n’iyo ikunyagira izahita.

Icya kabiri: ijuru riragukurikirana (2 Ngoma 16:9; 1 Petero 5:7; Ibyahishuwe 2:13), kandi ryiteguye kugutabara aho bikenewe, nuritabaza mu buryo ijwi ryo gutaka kwawe ryumvikanayo ibi bitera Imana guhaguruka (Yesaya 30:19; Luka 18:7).

Iyaba twari twemeye kuba abana bakundwa imbere y’Imana, tukayirekera uburenganzira busesuye bwo kutumenyera no kutugenera ibyiza bidukwiriye, mu byo dusaba, twagize amahoro menshi, dushubijwe cyangwa tudashubijwe nk’uko twasabye.

Kandi kuba ari Data wa twese mwiza, bituma amenya n’intege nke zacu. Yaduhaye Yesu ngo aduhuze nawe, aduha n’Umwuka wera ngo adusabire, mu ntege nke zacu, nk’uko Imana ishaka (Abaroma 8:26).

Umwe mu bizera niwe waririmbye ati:

“Ndi impumyi jyewe sinamenya ibyamfasha;
Ntabwo nzamwaka urufunguzo,
Ahubwo mfashe ukuboko kwe,
Mwiringiye, mwiringiye.”

Yavugaga nde? Yavugaga Yesu Kristo, inshuti n’umukiza w’abari mu isi. Iyo nshuti yacu rero, niyo yatwigishije gusenga igira iti: ‘mujye musaba byose mukennye, nk’abantu, ariko mureke kandi mwemere gushaka kw’Imana. Nimumara kuyimenyesha byose mwifuza, nk’abana bakundwa kandi baganduka, mujye mugira muti:

“Ibyo ushaka bibeho mu isi
nk’uko bibaho mu ijuru.”

Kandi nawe ubwe yatubereye icyitegererezo cy’ukuri, igihe yasengeraga i Getsemani, ari bugufi bwo kwicwa urupfu rw’ibivume rwo ku musaraba.

Yarasenze ati:

“Data, niba bishoboka, iki gikombe kindenge:
ariko bye kuba uko jyewe nshaka, ahubwo bibe uko wowe ushaka.”
(Matayo 26:39)

Ibyo ushaka Mana, bibe mu isi, nk’uko biba mu ijuru. Kandi ni byo! Ibyo Imana ishaka byonyine, nibyo bikwiye kuba mu isi, nk’uko biba mu ijuru. Sindabona muri Bibiliya, isengesho ry’abari mu ijuru basaba Imana ikintu icyo ari cyo cyose. Oya! Gushaka kw’Imana gusa niko guhari, kandi niko gukorwa. Ingaruka zabyo? Mu ijuru huzuye amahoro.

Nyamara isi yacu yo, kubera ibyigira imana byinshi muri yo, nta mahoro ifite. Satani n’abadayimoni barayivurunga, abanyabyaha bayiganjemo nabo bakabatiza umurindi. Ubutegetsi bw’igitugu, ivangura no kurenganya, ukwikubira ubutunzi bw’isi kwa bamwe, ubujura, uburozi, ubwicanyi, ubusambanyi, ubusinzi, imirwano, ivangura ry’uburyo butari bumwe, ukwikunda n’ibindi bibi byose bikorerwa kuri iyi Si, biri mu mugambi mubi no gushaka kubisha bya Satani. Nicyo gituma isi ibaye mbi, kuyibamo kugahinduka umutwaro ku byaremwe byose.

Ariko umugambi w’Imana, nk’uko isi yari iri ikiremwa, ni ukuyihindura Paradizo nziza abaremwe bazabamo batikanga ikibi.

Tukirindiriye uwo munsi mwiza wo kubaturwa kw’ibyaremwe byose (Abaroma 8:19), Yesu yatwigishije kujya dusenga tugira tuti:

“(...) Ibyo ushaka, bibe mu isi nk’uko biba mu ijuru.”
(Matayo 6:10)

Itoze kwemera gushaka kw’Imana, maze ujye usaba uti:

“Ibyo ushaka ko biba kuri jye,
naho byaba ibimbabaza;
kuko menye ko byose biva mu rukundo unkunda,
bibeho Mana.”

Kandi Imana ntihemuka; ntiyahemukira uyizera atyo. Mbese witeguye gutangira kwemera gushaka kw’Imana, uko kuri kose? Nugira utyo, uzaba uhisemo neza.

Umuririmbyi niwe wahamije iby’abahisemo iyo nzira, ati:

“Umutima uzatuza, n’umucyo uzaba mwinshi,
Niba dukurikiye inzira y’amasengesho.”

Kandi ati:

“Ndetse n’umwana muto, uzi gusenga Imana
Ntabwo azagira ubwoba, azafashwa no gusenga.”

Uzagira amahoro menshi yo mu mutima. Ab’isi babasha kubona ko ugushije ishyano, ariko wowe uzaba ufite amahoro yose kuko umenye kandi usobanukiwe ko uri mu ruhande rw’Imana, kandi ko muri kumwe.

Ntuzaba ukibabazwa n’ibyo ushaka utabona (kuko ubundi, ni rusange ku bantu), ahubwo uzajya unezezwa n’ibyo Imana iguhera ubuntu, mu gihe urindiriye ibyiringiro bizima by’abizera, nibyo SI NSHYA, iyo gukiranuka kuzabamo (2 Petero 3:13).

Ngaho rero, tangira usenge uti:

“Data wa twese uri mu ijuru,
Izina ryawe ryubahwe, ubwami bwawe buze.
Ibyo ushaka bibeho mu isi, nk’uko bibaho mu ijuru.”

Ubwire Imana nka Yesu uti:

“Data (kuko ari so), kwifuza kose ndifuza …..; ariko bye kuba uko nshaka, ahubwo bibe uko wowe ushaka.”

Maze nka Danyeli, ugende uhagarare mu mwanya wawe, uyirindire wizeye (Danyeli 12:13); kuko itazabura kugutabara ku isaha yayo, kandi ntizakererwa (Luka 18:1-8).

Nuko rero, ntimukiganyire. Ahubwo, ni ukuri:

“Nimusabe, muzahabwa;
Nimushake, muzabona;
Nimukomange, muzakingurirwa.”
(Matayo 7:7)

Nibyo! Nta mwana wasaba Se umutsima ngo amuhe ibuye (Matayo 7:9-10). Saba Imana ibyo kurya, kandi wizeye; ni ukuri, izabiguhera mu byo ukora. Icyakora ntukibe, kandi ntukariganye. Izo nzira ni iz’umwijima. Satani, se w’ikinyoma, niwe ushora abantu muri izo nzira, abizeza kuzibonamo ihirwe kandi iherezo ryazo ari ribi cyane (Imigani 14:12). Ntukazinyuremo!

Weho, saba Imana ibyo kurya, mu rugero rwo gutekereza kwawe no kwizera kwawe uhagurutswe no kubishaka, kandi uzabibona. Uzabona ibigutunga, ubone n’ibyo gutungisha benshi. Icyakora, habaho ubwo umuntu agera mu bihe by’ubutayu nk’ubw’abisirayeli banyuzemo bava mu Egiputa. Nibyo! Igihe umuntu atakibasha gukora (Yohana 9:4).

Bibiliya niyo ibaza iti:

“Niba imfatiro zishenywe, umukiranutsi yakora iki?”
(Zaburi 11:3)

Mbese hari igisubizo cyaboneka, mu bimeze nk’ibyo? Kandi imfatiro zashenywe? Yakora iki? Yagikora ahagaze he? Nicyo gituma ukwiriye kuba ku rufatiro ruzima, nirwo Jambo ry’Imana. Kandi Umwami Imana izaguha ubwenge muri byose (2 Timoteyo 2:7). Mu butayu bwawe urimo, Imana izaguheramo ubwenge bukwiriye, nubuyisaba (Yakobo 1:5-7).

Abisirayeli bari mu butayu, inzara yarabariye batakira Mose bati:

- “Turapfuye we!”

Mose nawe atakira Imana.

Mu gihe nk’icyo, Abisirayeli ntibashoboraga kwikorera kuko bari mu rugendo. Bakabaye batari no mu rugendo bari gukorera iki muri ubwo butaka bw’umucanga gusa? Data wa twese uri mu ijuru rero yamenye kubitaho, bamuhindukira nk’inyoni ze n’ibimera, biti ihi se nk’abana bato batazi kandi badashoboye gukora. Imana niyo yishingiye ibyo kurya byabo bya buri munsi, ibaha ‘manu’ yo mu butayu (Kuva 16).

Iyaba bari baramenye gusaba Imana ibyo kurya byabo bya buri munsi mu bihe bikoreraga, bakamenya ko ari yo yabibahaga, ntibaba baragiweho n’urubanza rwo kwitotombera Mose, bakababarisha Imana kuyivovotera batabizi. Nibyo! Kuko mu kwiganyira mu makuba yabo, bavuze bati:

“Iyo twicirwa n’Uwiteka mu gihugu cya Egiputa.”
(Kuva 16:3)

Mbese ibyo ntibyari ibyo kubabaza Imana? Kubakura ku ngoyi y’uburetwa no kugambirira kwirukana benshi muri Kanani ngo iyihe Abisirayeli, barangiza bakabihinduramo kugambirira kubicisha inzara mu butayu!? Byari ibyo kubabaza Imana.

Ariko nubwo bimeze bityo, Imana nk’umubyeyi w’umunyambabazi yabirenzeho, ibaha ibyo kurya.

Bibiliya ivuga ko, mu gihe cyose bamaze batungishwa manu, Abisirayeli bari bategetswe kurundanya ibikwiriye uwo munsi gusa. Ntibagombaga kuraza, keretse mu gihe kidasanzwe. Nyamara imana yo kutizera, umururumba no kutanyurwa, yabwiraga bamwe muri bo kubika n’iby’undi munsi. Wenda baribwiraga bati: “nta wamenya; none ejo manu itamanuka?” Mbese ubundi nibo babaga bagushije iya mbere? Kubera iki kwanga kwumvira uwayibazaniye? Ariko nta mugisha ku barwanya Imana, kuko bwacyaga ibyo baraje byaguye inyo ntibigire icyo bibamarira (Kuva 16:20). Ngibyo ibihembo kuri ba Maganya na ba Mutiringira. Nibyo!

“Ni nde muri mwe wiganyira
wabasha kwiyunguraho umukono umwe?”
(Matayo 6:27)

Mu gihe cyategetswe n’Imana, Abisirayeli bagombaga gutora iby’ijoro rimwe gusa, bihwanye n’uko umuryango wabo ungana. Iby’iryo joro gusa! Abizera bagakomeza kwizera ko iyabagaburiye iryo joro izabagaburira n’iry’undi munsi uzakurikiraho, ibihe n’ibihe. Bakarya buri munsi, bishingikirije ku kwizera Imana nk’uko ijambo ryayo ribivuga riti:

“Umukiranutsi wanjye azabeshwaho no kwizera.”
(Abaheburayo 10:38)

Nyamara kandi, mu kindi gihe cyategetswe n’Imana, ku munsi ubanziriza isabato, Abisirayeli bagombaga gutora byinshi bizaba bihagije ku isabato. Kuki? Ku ruhande rumwe, niko nibwira, byarashobokaga kubirunda kuko byabonekaga (kurusha uko byari bisanzwe). Ariko kandi, ku rundi ruhande, nta ndyanyi yabashaga kubyonona kuko hari mu gihe cy’umugisha w’Imana ku bakunda kwiteganyiriza iby’ahazaza.

Bibiliya itubwira ko benshi mu batumvira Imana, kubw’ubunebwe cyangwa se umutima unangiye, bitoreye iby’uwo munsi gusa. Wenda baribwiraga muri bo cyangwa hagati yabo bati: “Ni undi mukiro? Ibitabuze mu gasozi byo ni manu! Tuzatora ibindi ejo”.

Byabagendekeye gute? Bagiye gutora nk’uko bari basanzwe bagenza, babura n’iy’umuti. Kuko ibyo umuntu abiba ari byo agomba no gusarura; babibye gukiranirwa bihaye kutumvira Imana babigambiriye, maze basarura umukeno (Gutegeka kwa II 28:15-68). Naho abumvira Imana bo? Bari baguwe neza, bafite ibihagije kubatunga muri icyo gihe cy’ibura rya manu (Gutegeka kwa II 28 :1-14). Bibiliya iratubwira iti:

“Muvuge ko abakiranutsi bazagubwa neza,
kuko bazatungwa n’imirimo y’amaboko yabo.”
(Yesaya 3:10)

Reka ariko dutekereze ku bantu babaga batashoboye kurunda iby’iminsi ibiri kubera impamvu zitabaturutseho. Ahari batari bahari mu gihe cyo kurundanya manu; barwaye se, cyangwa bafite izindi nzitizi jye nawe tutabaterera amabuye.

Bibiliya ivuga ko ku wa karindwi, ku isabato nyine, abagiye kurunda ibyo kurya byabo by’uwo munsi batashoboye kugira icyo baronka. Kuki? Hari ku isabato. Nibyo! Ku isabato yo mu butayu, nta migisha y’iby’umubiri yabonekaga. Oya! Hari ku isabato nyine. Mbega agahinda! Barabwiriwe, baraburara. Amasengesho yose babashaga gusenga basaba ibyo kurya byabo by’uwo munsi, ntacyo yabashaga kubamarira; kuko hari ku isabato. Babagaho gute? Bagombaga gushinyiriza, kugeza isabato irangiye. Hagati aho ariko, bari abo gutungwa no gusonzorwa n’abo Imana ikoze ku mutima, babaga bahawe n’iyo Mana kurunda byinshi.

Mbese mu buzima busanzwe, mu mibereho ya mwene muntu munsi y’ijuru, ibihe nk’ibyo ntibibaho kenshi mu buzima bwa benshi? Mu mibereho yawe se ho bimeze gute? Aho ntiwaba uhagaze mu minsi yo gutungwa n’Imana buri munsi, nyamara udafite mu maboko yawe iby’umunsi w’ejo? Icyakora kugeza n’uyu munsi, ibyo kurya bya buri munsi urabibona; ikikugoye gusa ni ukumenya iby’ejo, kuko hatakugaragarira.

Ijambo ry’Imana riraguhugura riti:

“Ntimukiganyire mutekereza iby’ejo,
kuko ab’ejo baziganyira iby’ejo.
Umunsi wose ukwiranye n’ibibi byawo.”
(Matayo 6:34)

Aho ntiwaba uri mu minsi mibi, aho udafite namba? Aho ntiwaba uri mu gikombe kibi cya Baaka (Zaburi 84:6), kandi imvura nziza y’umuhindo ikaba itakugwira (Zakariya 10:1; Yeremiya 5:24)? Urashakira Uwiteka aho mwajyaga muhurira nyamara ntumuboneyo. Umeze nk’aho utigeze kugira icyiza ubonana Imana; bikubereye ku isabato pe!

Umuririmbyi niwe watanze ubuhamya mu ndirimbo agira ati:

“Najyaga njya ku iriba ry’iyi Si
Mfite inyota nyinshi cyane;
Naba ngiye kunywa agakama ubwo
Nuko nkayabura nkiheba.”

Mbega hari aho iriba ryo ku isi ritandukaniye n’isabato yo mu butayu? Kandi ni ukuri, uri ku isabato yo mu butayu. Ariko ukwiye gukomeza kwihangana. Uzi impamvu yo kwihangana? Ndaguha ebyiri:

Iya mbere, nuko “nta mvura idahita”;

Iya kabiri, nuko “nta joro ridacya”.

Imvura naho yaba nyinshi gute ibi bituma benshi basubika ingendo zabo, amaherezo irahita bakazisubukura. Abo yafatiye mu gasozi nabo kandi, ni iby’ukuri ko ibangamira urugendo rwabo, ikabakerereza, ndetse ikabasigamo imvune; ariko nyuma yo guhita kwayo, izuba rirarasa bagasusurukirwa, bagakomeza urugendo basubijwemo imbaraga nshya. Nibyo: “nta mvura idahita”! N’iyi ikunyagira izahita, n’iziha kukunyagira ntuzigere uyemerera kuguhabura; kuko nayo izahita.

Ijoro naho ryaba rirerire rite, cyangwa rikaba ricuze umwijima munini ibi bitera ubwoba n’abari mu nzu, ku iherezo rirashyira rigacya. Mu ijoro kandi, imirimo ya benshi irahagarara; kuko batakibasha gukora (Yohana 9:4). Ijoro ni igihe cyo gukora kw’abajura, abicanyi, n’abandi bakozi b’imirimo itandukanye y’umwijima. Abo ijoro riguye bakiri mu nzira, benshi muri bo ribatera ubwoba n’umutima uhagaze kubw’icyabagirira nabi babasha guhura nacyo. Ngo “ntawe utinya ijoro, atinya icyo barihuriyemo” (cyangwa ashobora kurihuriramo). Tuba mu mazu kandi tugakinga twikingira ibikorwa by’abagizi ba nabi mu ijoro. Nubwo ribereyeho kuturuhura, ariko twese tunezezwa no kubona igitondo, ubuzima bukongera bugakomeza.

Uko umuzamu yifuza igitondo (Zaburi 130:6), niko ugoswe n’ibiteye ubwoba byo mu ijoro nawe yifuza ko umuseke utambika (Yesaya 21:11). Ijoro ribasha kukubera rirerire kubera ibikomeye muri ryo bikuzengurutse, cyangwa urukuta rishyize hagati yawe n’imigisha iri mu munsi wifuza kugeramo; ariko amaherezo, riracya. Mbese ntaryo wibuka ryakeye, n’ubwo ryasize ubuhamya bwaryo? N’iri rikugose naryo rizacya, n’irizaza ryijimye gute naryo rizacya; kuko “nta joro ridacya”!

Ibyo ubona bikugoye rero, bizashira. Ikigeretse kuri ibyo, Imana ntiyakwibagiwe. Igaburira inyoni, ikarimbisha ubwatsi bwo mu gasozi, ntiyakuretse. Ni byo! Igufiteho umugambi; wurindire rero. Ugitegereje Imana, guma usenge ubudasiba, usaba Imana ibyo kurya bigukwiranye n’abawe, ugira uti:

“Data Imana,
uduhe none ibyo kurya byacu by’uyu munsi.”

Kandi uzabihabwa n’Imana. Yesu agufashe, Umwuka Wera agukomeze.

Icya mbere: Gupfa ntimuzapfa

Maze umuntu arabyizera, yibagirwa iyamuremye yari yaravuze iti:

- “No gupfa muzapfa”.

None Adamu na Eva barihe? Ntibapfuye se? Barapfuye, ndetse bokoza urupfu ababakomokaho bose.

Kumvira Satani ni bibi. Icyo avuze cyose, naho cyaba gisa n’icyiza gute, kikaba icyo kwifuzwa nk’imbuto z’igiti cy’ubwenge cyo muri Edeni ya kera, ntukagikoreho; kuko iherezo ryacyo riba ari ribi.

Kandi Satani ni umugome. Ubonye iyo agishishikariza umuntu kubanza kurya ku giti cy’ubugingo cyari muri Edeni, bituma yari kubaho iteka! Ubu nta busharire bw’urupfu twari kuba tugira, kandi nta ntimba, amarira n’agahinda abatuye isi bari kuba baterwa no kubura abo bakunda, bapfuye.

Icya kabiri: Muzahindurwa nk’Imana

Iki nicyo kinyoma gihambaye: Kuba nk’Imana.

Mbese ari ibishoboka kuba nk’Imana, ibyo ushatse byose bikaba, si ibyo kwifuzwa no gushakwa n’umwana w’umuntu wese mu minsi yo kubaho kwe? Nyamara, ntibishoboka. Umuntu ni umuntu, Imana ni Imana. Byashoboka bite ngo ikiremwa kingane n’umuremyi? Icyo rero cyari ikinyoma gikabije.

Umuntu naho yakomera gute, akagira icyubahiro n’igitinyiro kurusha bose, acyura igihe agapfa; cyangwa yagira ibyago ubuhangange bwe bugashira akiriho. Ariko Imana yo ihora ari Imana, iteka n’iteka, ibihe bidashira.

None Goliyati ari he? Salomo we? Naho se Nebukadineza? Ibyo ni ibihangange bivugwa na Bibiliya, n’ibindi ntarondora. Nyamara n’amateka y’iyi Si y’igihe cya none afite ibihangange byayo. Mbese ba Hitler, Napoleon, Igihangange Alexandre, n’abandi nkabo bari he? Kandi n’ab’ubwoko bwawe cyangwa igihugu cyawe nabo bagiye bagira ibihangange byabo; ariko bari he? N’abariho ubu, igihe cyabo kizarangira, ndetse ab’ibihe bizabakurikira ntibabe bakibibuka.

Ntukumvire Satani ugutera kwifuza kubi no gukorera guhindurwa nk’Imana. Ahubwo wowe, ujye uca bugufi mu mutima, icyubahiro ugiharire Imana yonyine. Mbese iby’umwami w’i Tiro ntibyakwigisha (Ezekiyeli 28:1-10)?

Icyaha kiraryoha ukigikora, ariko ingaruka zacyo zirasharira cyane. Kandi ibyo umuntu abiba, nibyo agomba gusarura. Adamu nawe yagombaga gusarura ibihwanye no gukiranirwa kwe, akabona ingaruka zo kutumvira Imana. Byamugendekeye gute?

Ubusanzwe, Adamu na Eva biriraga ku mbuto z’ubutaka, bagasoroma ibyo batahinze, kuko ubutaka bwameraga ibyo kurya by’ubwoko bwose byo kubatunga. Nyamara Adamu amaze gukora icyaha, ubutaka bwahindutse ukundi, imibereho yo ku isi yitera indi shusho.

Dore uko Bibiliya ibivuga:

“17. Na Adamu iramubwira iti: ‘ubwo wumviye umugore wawe, ukarya ku giti nakubujije ko utazakiryaho, uzaniye ubutaka kuvumwa; iminsi yose yo kubaho kwawe uzajya urya ibibuvamo ugombye kubiruhira;
18. Buzajya bukumereramo imikeri n’ibitovu; nawe uzajya urya imboga zo mu murima.
19. Gututubikana ko mu maso hawe niko kuzaguhesha umutsima, urinde ugeza ubwo uzasubira mu butaka, kuko arimo wakuwe: uri umukungugu, mu mukungugu nimo uzasubira.” (Itangiriro 3)

Nguko uko ubuzima ku isi bwahindutse. Maze umuntu avanwa muri Edeni atyo, yimurirwa mu isi ihwanye n’ibicumuro bye.

Kandi mbere yo gucumura, umuntu yari yambaye ubwiza bw’Imana. Amaze gucumura, ubwo bwiza bwahise bumuvaho, aboneka ko yambaye ubusa. Nicyo cyatumye Adamu na Eva batangira kwihishahisha kubera isoni z’ubwambure bwabo, bongera guterwa gutinyuka guhagarara ahabona n’imbabazi z’Imana yabagiriye gusa.

Kuki Imana itaretse ibyo bigande ngo binywe kandi byumve ingaruka z’icyo byari bimaze gukora? Oya! Urukundo n’imbabazi byayo ntibyabibasha. Yishe zimwe mu nyamaswa zayo (mu gihe abo bantu ari bo bagombaga kwicwa), maze ibaremera imyambaro y’impu, irayibambika (Itangiriro 3:21).

Umuntu ariko ntiyarekeye aho kugoma mu maso y’Imana! Kayini yishe mwene nyina Abeli (Itangiriro 4:1-8); kandi abantu batangiye kugwira, bagenda barushaho gukabya ingeso mbi cyane: ubwambuzi, kwica, kugira urugomo, ubusambanyi bw’uburyo bwose, n’ibindi. Nuko bahindanya isi, bituma Imana yicuza icyatumye irema umwana w’umuntu. Nibwo yafashe umugambi wo kubatsemba ku isi (Itangiriro 6:1-8).

Bibiliya iratubwira ngo:

“Ariko Nowa we agirira umugisha k’Uwiteka.”
(Itangiriro 6:8)

Kuba Nowa we yaragiriye umugisha k’Uwiteka, suko we atari kubonwamo inkumbi bamushunguye; ahubwo nuko Imana yari ikomeje gukunda umuntu yaremye, idashaka ko urwibutso rwe rushira munsi y’ijuru. Nicyo gituma byanditswe neza gutya ngo:

“[...] agirira umugisha k’Uwiteka.”

Nyamara kandi nyuma ya Nowa, ntabwo abantu bisubiyemo ngo batinye Imana, bayubahe; ahubwo barushijeho gukora ibyangwa n’Uwiteka, no kumwendereza. Bwa bwenge bwo kumenyesha icyiza n’ikibi bwari he? Byamariye iki umwana w’umuntu kutumvira Imana? Ntacyo umuntu ajya abona mu nzira mbi, cyo kumugirira umumaro; ntibibaho. Aho kugirango umuntu abone ubwenge, n’ubwo yari afite bwahise bucura umwijima, Satani asigara ari we mwami we, amukoresha kandi amutwaza igitugu muri byose; asigara abaho ubuzima bupfa hato na hato kandi nabi, budafite ibyiringiro haba akiriho cyangwa nyuma yo gupfa.

Ni iki kandi Imana yari ishigaje gukora kuri ubu umuntu yiremeye yari amaze kwigarurirwa na Satani, agahindanya isi ibi bitavugwa?

Ijambo ry’Imana riratubwira ngo:

“Nyamara aho ibyaha byagwiriye
niho n’ubuntu bwarushijeho gusaga.”
(Abaroma 5:20)

Umva imbabazi n’urukundo by’Imana; uti:

- “Nteze yombi!”

Nk’uko habaye inama yo kurema umuntu, niko mu ijuru hongeye kuba indi nama yo kwiga ku bye amaze gukabya kugoma; nyamara kandi hatagamijwe kumurundaho umujinya no kumutsembaho, ahubwo hakigamijwe kureba uko yacungurwa, akabaho.

Nyamara kubohora umuntu mu bubata bukomeye gutyo no mu ngoyi za Satani zose yari amaze kwihambiriza, byari ibintu bitoroshye. Keretse ko nta kinanira Imana.

Nibwo rero Imana iteguye gahunda ndende y’uko umuntu azacungurwa, imibabaro n’ibiruhije uzamucungura agomba kuzanyuramo, byose ibirundaniriza mu gitabo kimwe igifatanisha ibimenyetso; maze itumiza inama. Ku murongo w’ibyigwa hariho iki? Hariho ikintu kimwe gusa: Gucungura umuntu.

Nta ngamba zari zije kwigwa, kuko zari zamaze gufatwa. Ahubwo ikibazo cyari iki gusa:

“Ni nde wemeye kwitanga ngo amene ibimenyetso bifatanije kiriya gitabo, bityo abe ariwe uzajya gucungura umwana w’umuntu?”
(Ibyahishuwe 5:2)

Bibiliya ikomeza itubwira ko hatabonetse n’umwe wo kubihangara, yaba uwo mu ijuru, cyangwa uwo mu isi, cyangwa uw’ikuzimu; yewe ngo habe no kukireba (Ibyahishuwe 5:3).

Cyari igitabo giteye ubwoba kugitekereza no kukireba kubera ibikirimo, nkanswe kwihara ngo uragiterura uzi ko kugira gutyo ari ugufungura urugi rw’imibabaro yo muri cyo kuri wowe kandi nta gusubira inyuma kugihari.

Mbega akaga! Umucunguzi yari abuze rero! Mbese ak’umuntu ntikari gashobotse? Yari agiye kuba uwo kurimburwa buheriheri no gutsembanwa na Satani wari waramwigaruriye.

Yohani wabyerekwagwa ntiyashoboye kwifata, kuko yarize amarira menshi (Ibyahishuwe 5:4), agataka nk’umugore uri ku bise (Mika 4:9).

Mu gihe kigoye nk’icyo, urukundo rw’Imana ntirwatsinzwe. Oya rwose! Umugani w’ikinyarwanda niwo uvuga uti: “Imfura na Se barangana”.

Mu gihe mu bamarayika b’Imana ntawari ubonetse wabasha kwemera, mu bakuru bo mu ijuru habuze n’umwe, yewe n’ikuzimu naho nta n’umwe ubonetse, bigaragara ko nta kindi cyiringiro gisigaye, nibwo umwana w’Imana w’ikinege Yesu yahagurutse; yitangaho umutabazi wo kubabazwa iyo mibabaro yose ngo mwene muntu acungurwe (Ibyahishuwe 5:5).

Mbese utekereza ko muri gahunda z’Imana harimo ko ari “Yesu” wagombaga gutabara? Ahari birashoboka; ariko Bibiliya ntaho ibigaragaza ityo. N’ubusanzwe kandi, nta mwana w’umwami utabara; hatabara ingabo.

Byari gushoboka rero ko Imana ivuga iti:

- “Ntibikabeho, mwana wanjye, ko ujya mu iriya mibabaro.”

Siko umubyeyi wese yabigenzereza umwana we akunda se? Cyane cyane abizi neza ko ari inzira abasha no kuzagwamo!? Nyamara ku Mana ho siko byagenze; kubera urukundo yakunze umwana w’umuntu. Bibiliya iratubwira iti:

“Kuko Imana yakunze abari mu isi cyane,
byatumye itanga umwana wayo w’ikinege,
kugirango umwizera wese atarimbuka,
ahubwo ahabwe ubugingo buhoraho.”
(Yohana 3:16)

Urwo rukundo rukomeye cyane rw’Imana ntirwashoboye kwimana umwana wayo, nubwo yari ikinege, kugirango mwene muntu ye kurimbuka; ngo ahubwo azabane n’Imana iteka, mu bwami bw’amahoro.

Mbese mu bimeze nk’ibyo umuntu ntiyagiyemo Imana undi mwenda? Guhara umwana wawe umwe, ukemera kuba incike, kubera abo ushaka kurengera! Aha ga na Yesu akwiriye gukuzwa no gushimwa iteka kuko yabyemeye! Yesu, wagize neza kwemera kuza kuducungura.

Umuririmbyi umwe niwe wabajije ati:

“Mbese iyo Yesu aza kugira intege nke,
cyangwa agasiganya ingabo zo mu ijuru,
twari kuba he?”

Kari kuba katubayeho! Ibyacu, jye na we, byari birangiye rwose; kandi nabi. Nguko uko Yesu yaje mu isi. Nyamara se yakiriwe ate n’abo yari aje gucungura?

Icya mbere, mu ivuka rye, ntaho kuvukira hakwiye yabonye, keretse mu kiraro cy’inka, naho kandi kubwa burembe (Luka 2:1-7).

Icya kabiri, ubutegetsi bwariho bwakiranye uwo mucunguzi amacumu n’inkota, bituma ahungishirizwa mu Egiputa ngo abeho; nuko amenya ubuhunzi akiri mu kigero umwana aba ataramenya gutandukanya icyiza n’ikibi (Matayo 2:13-23).

Icya nyuma, abo yaje gukiza kandi akabakiza, abo yagaburiye bagahaga, abo yakirije ababo barwaye, abamusingije n’akanwa kabo ngo “Hosana, hahirwa uje mu izina ry’Uwiteka” (Matayo 21:9), nibo bamuciriyeho iteka ngo “Nabambwe”. Kandi ga Pilato yanze kumubamba baramwibambira! Bamwica urupfu rw’agashinyaguro n’urukozasoni, yambikirwa ubusa ku musalaba (Matayo 27).

Bibiliya irabihamya iti:

“Yaje mu bye,
ariko abe ntibamwemera.”
(Yohana 1:12)

Urakagubwa gitumo n’ibikubabaza, birabazwa. Ariko kubaho ubizi ko nta byiza bigutegereje imbere, keretse umubabaro no gushinyagurirwa! Mbega, si akaga? Nyamara uyu Yesu we yari yarabyemeye. Nta mubabaro n’umwe wari mu muzingo w’igitabo yameneye ibimenyetso atagombaga kubabazwa. Mbese bimwe muri iyi mibabaro ntibyari byarahishuriwe abahanuzi bashoboye kwinjira kure mu mabanga y’Imana, mbere y’uko uyu mucuguzi ageza ikirenge cye ku isi?

Mu gihe ahazaza h’umwana wese haba hahishwe maze abamukunda bakamwifuriza kandi bagahirimbanira kumubona agera ku byiza muri aho hazaza he, ibya Yesu byo byari byarashyizwe hanze n’abahanuzi, byandikirwa kugirango abarondora ibyanditswe bazamenye isaha bagenderewemo. Abari barabihanuye, bakabyandikisha, bari barapfuye. Ariko umwe muri ba Bamenya w’Imana wari usigaye, wari warabwiwe n’Umwuka w’Imana ko atazasinzira atabonye agakiza k’Abisirayeli, yabonye uwo mwana abwira nyina ko inkota izamucumita mu mutima kubw’ibizamubaho (Luka 2:34-35).

Muri ibyo byose, Bibiliya iratubwira iti:

“Ariko Mariya abika ayo magambo yose mu mutima we, akajya ayatekereza.”
(Luka 2:19)

N’ibindi byose byari byarahanuwe, n’ibyo yabonaga, yabibitse mu mutima we; ariko nk’umubyeyi, cyari igikomere kitari kuzigera gikira mu minsi y’ubusuhuke bwe yose.

Ariko abahanuzi ba kera bari barahishuriwe ibiki?

Yesaya yari yarahishuriwe ibi bikurikira:

“Abakubita nabategeye umugongo,
n’imisaya nyitegera abampfura uruziga;
kandi mu maso yanjye sinahahishe
gukorwa n’isoni no gucirwa amacandwe.”
(Yesaya 50:6)

Ahandi kandi, Yesaya yanditse ibikurikira kubyo yahishuriwe kuri uwo munyamibabaro. Ati:

“1. Ninde wizeye ibyo twumvise? Kandi ukuboko kw’Uwiteka kwahishuriwe nde?
2. Kuko yakuriye imbere ye nk’ikigejigeji, nk’igishitsi cyumburira mu butaka bwumye; ntiyari afite ishusho nziza cyangwa igikundiro, kandi ubwo twamubonaga, ntiyari afite ubwiza bwatuma tumwifuza.
3. Yarasuzugurwagwa, akangwa n’abantu; yari umunyamibabaro wamenyereye intimba; yarasuzugurwagwa nk’umuntu abandi bima amaso, natwe ntitumwubahe.
4. Ni ukuri, intimba zacu nizo yishyizeho, imibabaro yacu niyo yikoreye; ariko twebweho twamutekereje nk’uwakubiswe n’Imana, agacumitwa nayo, agahetamishwa n’imibabaro.
5. Nyamara ibicumuro byacu nibyo yacumitiwe, yashenjaguriwe gukiranirwa kwacu; igihano kiduhesha amahoro cyari kuri we, kandi imibyimba ye niyo adukirisha.
6. Twese twayobye nk’intama zizimiye, twese twabaye intatane; Uwiteka amushyiraho gukiranirwa kwacu twese.
7. Yararenganye ariko yicisha bugufi, ntiyabumbura akanwa ke, amera nk’umwana w’intama bajyana kubaga, cyangwa nk’uko intama icecekera imbere y’abayikemura, niko atabumbuye akanwa.
8. Guhemurwa no gucirwaho iteka, nibyo byamukujeho; mu b’igihe cye ni nde witayeho ko yakuwe mu isi y’abazima, akaba yarakubitiwe ibicumuro by’ubwoko bwe?
9. Bategetse ko ahambanwa n’abanyabyaha, yari kumwe n’umutunzi mu rupfu rwe; nubwo atagiraga urugomo, kandi ntagire uburyarya mu kanwa ke.
10. Ariko Uwiteka yashimye kumushenjagura, yaramubabaje, […]” (Yesaya 53)

Dawidi nawe, kuri uwo munyamibabaro, yahishuriwe ibikurikira:

“13. Baranyasamiye n’akanwa kabo, nk’intare itanyagura yivuga.
14. Nsutswe nk’amazi, amagufka yanjye yose arakutse, umutima wanjye umeze nk’ibimamara; uyagiye mu mara yanjye.
15. Intege zanjye zumye nk’urujyo, ururimi rwanjye rufatanye n’uruhekenyero. Kandi unshyize mu mukungugu w’urupfu.
16. Kuko imbwa zingose, umutwe w’abanyabyaha untaye hagati, bantoboye ibiganza n’ibirenge.
17. Mbasha kubara amagufka yanjye yose; bandeba bankanuriye amaso.
18. Bagabana imyenda yanjye, bafindira umwambaro wanjye.
19. Ariko Uwiteka, ntumbe kure; ni wowe muvunyi wanjye, tebuka untabare.” (Zaburi 22)

Kandi koko byamusohoyeho gutyo, byose uko byakabaye. Reba nawe. Mu rubanza imbere ya Pilato (Matayo 27:11-26), uyu yabajije rubanda ati:

- “Ari Baraba (w’umujura n’umwicanyi) ari na Yesu (wabakizaga indwara n’inzara) mbabohorere nde?”

Abari aho n’urusaku rwinshi, mu mvugo imwe nk’aho bari babanje kubikorera inama, bati:

- “Baraba.”

Pilato ati:

- “Yesu witwa Kristo ndamugira gute?”

Kuko yari atunguwe rwose! Yashakaga impamvu yo kurekura Yesu, ariko dore byose yatekerezaga biranze rwose. Uyu Yesu ntacyo yari yagakoreye Pilato ku giti cye kizwi kugeza icyo gihe, ariko dore none abo yagiriye neza bamurutishije Baraba wari warababujije amahwemo, agiriwe impuhwe n’utari ugakwiye kuba ariwe uzimugirira kuko ntacyo mu bwenge bwe yamwituraga!

Bose bati:

- “Nabambwe.”

Pilato ati:

- “Kuki? Yakoze cyaha ki?”

Nta gisubizo gihamye Pilato yahawe. Kandi mu kuri, nta cyari gihari. Urwango umwijima wanga umucyo rwari rumaze kuzura mu mitima y’abantu kubera ko uwo mucyo wagaragazaga ububi bwabo, ukaremereza ubukene bwo mu mitima yabo bwo kugarukira Imana. Nuko acirwa urwo gupfa atyo, nta jwi rimuvugiye icyiza.

Mbese uratekereza gutyo umubare w’abanyabyaha bari bagose Yesu muri ayo masaha ye ya nyuma yo gusohoza ubutumwa? Mu rukiko basakurizaga rimwe ngo ‘nabambwe, nabambwe’! Naho se ku musaraba?

Kuri uwo musaraba, ukozwe mu giti kitabaje, ntiyahambirijwe imigozi cyangwa imyenda, ahubwo bamubambishije imisumari, bayimutera mu biganza bye no mu birenge bye.

Kuri uwo musaraba kandi, ntiyazamukanye yo icyubahiro cye, kuko bamubambye bamaze kumucuza imyambaro ye, barayigabanganya; bageze ku ikanzu ye bakoresha ubufindo ngo bamenye uri buyitware.

Abagore babonaga Yesu mbere ataragera muri iyo mibabaro, bifuzaga kuba ari bo bamubyaye, ndetse umwe muri bo ntiyari yarabashije kubiceceka arabimwaturira ati:

“Hahirwa inda yagutwaye n’amabere yakonkeje.”
(Luka 11 :27)

Nyamara bamubonye k’uwo musalaba w’isoni n’agashinyaguro, no mu nzira iwuganaho, ntibifashe kurira no kugenda bikubita mu gatuza (Luka 23:26-31); ninde muri bo wari kuba akifuza kuba nyina w’uwo munyamibabaro? Ntiyari akiri uwo kwifuzwa rwose (Yesaya 53:2), kuko cyari ighe cya ya nkota yahanuwe ko izacumita mu mutima w’uwamwonkeje (Luka 2:35).

Mbere yo kumubamba kandi, kimwe no ku musalaba, Yesu yarashinyaguriwe bitavugwa.

Ndi kumureba kwa Pilato, mu bwiherero bari kumukubita ibipfunsi, imigeri n’ibiboko byungikanya kandi apfutse mu maso, maze bakamubwirana agashinyaguro bati:

“Duhanurire, Kristo; ni nde ugukubise?”
(Luka 22:64)

Ndamubona kandi bamwambika ikamba ry’amahwa mu mutwe, bakamufatisha n’inkoni y’urubingo mu ntoki, avirirana umubiri wose kubw’inguma, barangiza mu kumushinyagurira bakamuterera isaluti bagira bati:

“Ni amahoro, mwami w’abayuda?”
(Yohana 19:3)

Ndamwishushanya bamukubita imigenda, yihekeye uwo musalaba w’isoni n’imibabaro yari agiye kubambwaho, ntawe umufitiye impuhwe zo kuwumwakira (Luka 23:27).

Ndamutekereza bari kumushinyagurira ku musalaba, nawe yishwe n’inyota, inzara no kubabazwa n’ibikomere. Ngabo abamutukaga, abamukinaga ku mubyimba, abamuciraga amacandwe, n’ibindi (Matayo 27:38-44). Byantagaza, muri abo banyabyaha, harabuzemo uwamuteye ibuye cyangwa umujugujugu w’inkoni. None se ko “iguye hasi ntayo itayigera ihembe”!

Cyari igihe cy’ubwami bw’umwijima.

Nyamara guhera ku isaha ya gatandatu, habaho ubwirakabiri. Urusaku ruratuza gato, abantu bategereje ikigiye gukurikiraho.

Mu isaha ya cyenda, ku musalaba, Umwami w’abami arataka cyane ati:

“Eloi, Eloi, Lama Sabakitani?”
(Mariko 15:34)

Bisobanurwa ngo:

“Mana yanjye, Mana yanjye;
ni iki kikundekesheje?”
(Matayo 27:46)

Mu gutaka k’uyu munyamibabaro, yagize ati:

“Mfite inyota.”

(Yohana 19:28)

Maze aho kumuzanira utuzi ngo tumuramire agatima, niko kwibwira bati:

- “Tumenye icyarushaho kukumvisha!”

Nibwo birutse, bazana inzoga y’umushari, barayimunywesha, umutima uraca, umwuka urahera (Matayo 27:48- 50).

Nyamara kandi uyu munyarukundo rutagereranywa, uyu munyambabazi zitarangira iteka, agifite umwuka muri we, agishobora kuvuga, nubwo bamutukaga banamubabaza bate, ntiyabavumye; ahubwo yabasabiye ku Mana, ati :

“Data, ubababarire; kuko batazi icyo bakora.”
(Luka 23:34)

Imana ishimwe kuko izo mbabazi zikibeshejeho abatuye isi, na bugingo n’ubu.

Ni nde wo gutsinda urukundo mu ntambara? Mbese urupfu twaroshyemo Yesu, sirwo Imana Se yagombaga kuturohamo? Nyamara siko byagenze. Urukundo ni urw’iteka, ntirushira.

Yesu amaze gutsinda ingoyi z’urupfu, ntiyihoreye; ahubwo yaratwumvise, araduhumuriza, kandi atuma abakiriye iryo humure ku bari mu isi bose, ati:

“46. Niko byanditswe ko Kristo akwiriye kubabazwa no kuzuka ku munsi wa gatatu,
47. Kandi ko kwihana no kubabarirwa ibyaha bikwiriye kubwirwa amahanga yose mu izina rye, bahereye kuri Yerusalemu.” (Luka 24)

Kandi ati:

“18. Nahawe ubutware bwose mu ijuru no mu isi.
19. Nuko mugende muhindure abantu bo mu mahanga yose abigishwa, mubabatiza mu izina rya Data wa twese, n’umwana, n’Umwuka Wera;
20. Mubigisha kwitondera ibyo nababwiye byose. Kandi dore ndi kumwe namwe iminsi yose, kugeza ku mperuka y’isi.” (Matayo 28)

Kandi ati:

“Uwizera akabatizwa, azakizwa;
ariko utizera, azacirwaho iteka.”
(Mariko 16:16)

Nicyo gituma nta bwoba dufite, ahubwo turi mu mahoro ku ngoma y’uwo twahemuye. Kuko twizeye ijambo rye, tugakizwa n’ubuntu bwe. Mbega urukundo nk’urwo twarugereranya dute?

Mbese abaca imigani ntibavuga ngo “iyo amagara atewe hejuru, umwe asama aye undi agasama aye”? Nyamara nubwo amagara ye atari atewe hejuru, aho yari yibereye mu bwami bwa Se, aramywa kandi agasingizwa n’abamalayika, Yesu we yayashyize mu kaga kubera ayacu. Bigeze aho rukomeye kandi, ntiyigeze ashaka kwikiza namba ataturokoye iteka twaciriweho, ngo abe incungu yacu (Matayo 26:53-54).

Nguwo umwenda w’urukundo dufite, ngiyo imvo n’imvano yawo. Mbega tuwugendamo dute? Dukwiye guhora twibuka ineza n’imbabazi twagiriwe.

Havugwa igitekerezo cy’icyugu n’inuma. Uti:

- “Byagenze gute?”

Inuma n’icyugu byabanaga mu ishyamba, ari inshuti magara ntusige. Inuma yabaga mu bushorishori bw’igiti, arimo ifite icyari cyayo; icyugu nacyo kikaba mu mwobo cyifukuriye, munsi y’imizi y’icyo giti.

Reka rero, umunsi umwe, ishyamba rizashye inuma yagiye gushakashaka utwo gutungisha abana bayo. Abo bana batari bakamenya kuguruka, birumvikana, bari basigaye mu cyari. Ishyamba rirashya, ibyatsi byo hasi birakongoga, inkongi ishyingira n’ubushorishori bw’ibiti.

Icyugu aho cyari cyibereye mu mwobo, cyari mu mahoro yose, akaga kari kaje ntikakirebaga namba, cyo n’abacyo. Muri uko gushya kw’ishyamba, Cyugu yibuka abana b’inshuti ye bari mu bushorishori bw’igiti, badafite gitabara. Cyugu yari gukora iki? Kuko gutabara byari bisobanuye gushyira ubugingo bwe mu kaga, atanashidikanya no kuba yabubura; kwari ukwiyahura rwose.

Mu mutima wa Cyugu habayemo intambara ebyiri: (i) ‘Kutishora mu kaga’ , no
(ii) ‘Gutabara abana b’inshuti ye’.

Kubera ko urukundo nyakuri rudatsindwa, Cyugu ntiyashoboye kuninira ijwi rimubwira kwitanga no kujya gutabara abari mu kaga, nubwo we yari yibereye mu mahoro. Niko kuzamuka igiti , ibirimi by’umuriro bimutwika ibitugu hose, agera mu cyari kitarafatwa, afumbata ba bana b’inuma mu gituza, umuriro awuha ibitugu, amanuka ubutareba inyuma, ashyitsa abana b’inuma mu mutekano, mu mwobo aho inkongi itari igifite kugira icyo yabatwara.

Aho Numa atahukiye, asanga ishyamba ryakongotse, ahari ahe hatakimenyekana. Nta gushidikanya, abe bari bashiriye muri uko kurimbuka gukabije. Niko gutaratamba hejuru y’igiti yari atuyemo, arira kandi ataka cyane n’intimba nyinshi ati:

- “Abana banjye wee! Abana banjye wee! Abana banjye wee!”

Numa uwo ntiyari akiri uwo guhozwa rwose.

Mu mwobo, Cyugu yumva ijwi ry’inshuti ye ritakana umubabaro, yiganyira kandi ashenjaguwe n’ibyo ataburaga kwibwira nk’iherezo ry’abana be; niko gukururuka (kuko yari yashegeshwe n’ubushye bikabije), ahagarara ku munwa w’umwobo we, ahamagara Numa n’ijwi rirenga uko ybashaga, ati:

- “Humura, abana bawe bari hano.”

Numa yabonye abana be ari bazima, Cyugu nawe arwara ibisebe by’ubushye igihe kirekire; icyakora biza gukira, ariko bimusigiye ubusembwa bugaragara ku ruhu rwe. Maze Numa, mu kumarwa n’umwenda w’urukundo yashyizwemo atyo na Cyugu, atoza abana be kujya bashimira Cyugu iteka, uko bavuze.

Niyo mpamvu inuma ivuga igira iti:

- “Gu-gu! Gu-gu, Gu-gu!”

Burya ngo iba ivuga iti:

- “Cyugu, warakoze!”

Bityo, bityo.

Ni igitekerezo, nibyo; ariko cyakwigisha.

Dushimira Yesu Kristo dute ineza yose n’imbabazi yatugiriye? Izina rye ntiryari rikwiye kuzura mu kanwa kacu, akaba ariwe twirahira iteka?

Kwihanganirwa bingana iki byajyaga kumubashisha kwishyura uwo mwenda ungana utyo? Ntiyabashaga kuwishyura rwose, ubuzima bwe bwose. Bibiliya itubwira ko umwami amubonye atyo, yafashwe n’impuhwe nyinshi. Uretse no kumwihanganira yasabaga gusa, aramubabarira; amuharira uwo mwenda. Niba uyu mugaragu yarabaye nk’umusazi akagenda yitera hejuru asakuza kubera ibyishimo, ntawe utamwumva mu mwanya we.

Reka rero nawe aze gupimirwa ku minzani ireshya (Yobu 31:6)!

Mu kanya gato gusa atarabutse ibwami, uyu mugaragu wari ukimara kubabarirwa umwenda (wa FRW 60,000,000,000) atari kuzapfa yishyuye nibwo yahuye na wa mukene wamugombaga ubusabusa ugereranije n’ibyo yari amaze kubabarirwa (FRW 100,000 gusa). Ngo yahise amusanganiza ijambo rimwe gusa:

- “Nyishyura.”

Ayo kugira ate? Wenda yashakaga ayo kujya gukoresha umunsi mukuru wo kwishimana n’abe bose akaga akijijwe n’ijambo rimwe gusa: ‘Ndakubabariye’; biti ihi se ‘Ndaguhariye’.

Bibiliya itubwira ko uwo mukene yamwikubise imbere, aramwinginga agira ati:

- “Nyihanganire, nzakwishyura.”

Uko nawe yatatse ubwo yishyuzwagwa (i.e. nyihanganire), niko nawe yatakiwe ubwo yishyuzaga. Kuki atahise abona iyo shusho, ko nta n’umunsi wari utambutse hagati y’ibyo bihe byombi? Umutima we wari warapfuye kera, atabona ibigaragarira bose, atumva naho byaba mu rusaku rungana rute, adakorwaho ku mutima; imbabazi no kwihanganira abandi, ngicyo ikintu atari azi mu buzima bwe. Uyu mukene yamusabaga icyo adafite rwose, atanigeze; biti ihi se cyapfuye muri we kera. Nibwo amukurubanye no ku nzu y’imbohe, amutamo; kandi asiga atanze itegeko ko ntabyo gutekereza kumurekura atarangije kwishyura umwenda wose. Ryari itegeko ritanzwe n’umugaragu w’umwami, nta kindi abacungagereza bajyaga gukora uretse kuryubahiriza.

Tekereza nawe: yababariwe kandi aharirwa umwenda wa miliyari mirongo itandatu (FRW 60,000,000,000) wose, ariko we ntiyabasha kubabarira no guharira umwenda w’ibihumbi ijana (FRW 100,000) gusa. Umeze nk’uyu mugaragu n’abe byabagora kumwumva, mu mwanya wo kumubabarira.

Ababonye ibyo kutababarira uyu mugaragu yagize nyuma yo kwibera abahamya b’imbabazi zitagira akagero yari amaze kugirirwa, nibo bitwariye iyi mbohe imbere y’umwami, bamubwirana agahinda ibyo bamaze kubonesha amaso yabo. Nuko umwami ahita atumiza uwo Ntampuhwe; niko kumubaza ati:

- “Naguhariye wa mwenda wose, kuko wanyinginze; nawe ntiwari ukwiriye kubabarira mugenzi wawe, nk’uko nakubabariye?”

Maze mu burakari bwinshi, umwami akuraho za mbabazi. Nguko uko uwari ubohowe yongeye gusubira mu ngoyi, yakwa imbabazi yari yahawe; nubwo ntashidikanya ko yongeye kuzitakambira, ndetse arira cyane kurushaho, ariko ntiyabasha kongera kuzibona kubera ko yakerensheje ubuntu yari yagiriwe mbere (Abaheburayo 12:15-17).

Nibyo! Bibiliya ibihamya neza iti:

“[...] Urugero mugeramo ni rwo muzagererwamo
kandi muzarushirizwaho.”
(Mariko 4:24)

Yesu nawe, amaze kwigisha uwo mwigishwa uko akwiriye gusenga, yagarutse ku iri jambo ngo:

“Uduharire imyenda yacu,
nk’uko natwe twahariye abarimo imyenda yacu.”
(Matayo 6:12)

Mu kubivuga neza:

“Utubabarire ibicumuro byacu,
nk’uko natwe tubabarira abaducumuraho.”

Mu kubyumvikanisha gutyo, Yesu yagize ati:

“14. Kuko nimubabarira abantu ibyaha byabo, na So wo mu ijuru azabababarira namwe;
15. Ariko nimutababarira abantu, na So nawe ntazabababarira ibyaha byanyu.” (Matayo 6)

Nuko rero, icyo umuntu abiba, nicyo azasarura. Nibyo!

“Utubabarire ibyaha byacu,
nk’uko natwe tubabarira abaducumuraho.”

Bivuze iki?

“Mu kigero tubabariramo,
abe aricyo natwe utubabariramo Mana.”

Nicyo ibyo bivuze. None utajya ababarira, iryo sengesho ntirimucira urubanza? Nibyo rwose! Ni nko kuvuga ngo:

“Ntumbabarire ibyaha byanjye,
kuko nanjye ntajya mbabarira abancumuraho.”

Mbese urashaka imbabazi z’Imana? Simbishidikanya, urazishaka.

Ngaho rero, itoze kubabarira bose bagucumuraho. Ujye umenya no kubaharira imyenda, mu gihe abayikurimo badashaka cyangwa badashoboye kuyikwishyura (Gutegeka kwa II 15:1-11). Ikigeretse kuri ibyo kandi, ujye uniga kuramburira ukuboko abakene mu bibazo byabo; burya Imana irabikunda, kandi biyitera kwishimira abagira batyo (Yesaya 58:7), ntikorwe n’isoni zo kwitwa Imana yabo (Abaheburayo 11:14-16); kandi ikabaha umugisha (Gutegeka kwa II 28:1-14), no guhirwa mu nzira zabo, ibisekuru n’ibisekuru (Yesaya 58:8-12).

Kandi ufite isezerano ry’ibyiza, nuba umunyambabazi. Yesu yaravuze ati:

“Hahirwa abanyembabazi,
kuko bazazigirirwa.”
(Matayo 5:7)

Kandi yanongeyeho ati:

“Hahirwa abagwaneza,
kuko bazaragwa isi.”
(Matayo 5:5)

Mu neza yawe, ukwiye kwitoza kuba umugwaneza, umunyampuhwe, umunyabuntu n’umunyambabazi. Nibyo! Ubugwaneza imbere y’abantu mu bishiraniro byo muri iyi si barwanira bahutazanya, impuhwe n’ubuntu ku banyamibabaro bo muri iyi si mu rugamba rw’ubuzima bwabo, n’imbabazi kuri bose bagucumuraho. Kandi,

“Nutanga imbabazi, uzabona amahoro.”
(Papa Yohani Paulo II)

Hanyuma usenge uti:

“Data wa twese uri mu ijuru,
izina ryawe ryubahwe, ubwami bwawe buze;
ibyo ushaka bibeho mu isi
nk’uko biba mu ijuru.
Uduhe none ibyo kurya byacu by’uyu munsi.
Uduharire imyenda yacu,
nk’uko natwe twahariye
abarimo imyenda yacu.”

Nugenza utyo, Imana y’amahoro izabana nawe (Abafilipi 4:9); kandi nutaka, izavuga iti:

“Ndi hano.”
(Yesaya 58:9)

Urugero rwa mbere :
Aburahamu asabwa gutamba umuhungu we w’ikinege.

Bibiliya ivuga iki kuri Aburahamu? Hirya y’amateka ye yanditse mu gitabo cy’Itangiriro, dusoma ibi ngo:

“Kwizera ni ko kwatumye Aburahamu yumvira Imana
imuhamagariye kujya aho yari agiye kuragwa;
nuko agenda atazi iyo ajya.”
(Abaheburayo 11:3)

Nawe, tekereza! Umuryango Aburahamu yakomokagamo ntiwari uzi Uwiteka Imana. Bari bafite imana nyinshi basengaga, bakazitura amasengesho yabo yose. Ahari n’Imana itamenywa nk’iyo Abagiriki bo mu Atenayi bo mu gihe cya Pahulo basengaga (Ibyakozwe n’intumwa 17:16-34) nayo yari igenewe ibitambo byayo.

Ariko Aburahamu (witwaga Aburamu icyo gihe) yumva ijwi ry’iyo Mana Itamenywa rimubwira riti:

“1. Va mu gihugu cyanyu, usige umuryango wanyu n’inzu ya so, ujye mu gihugu nzakwereka.
2. Nzaguhindura ubwoko bukomeye, nzaguha umugisha;
3. Kandi nzaha umugisha abakwifuriza umugisha, kandi uzakuvuma nzamuvuma; kandi muri wowe, nimwo imiryango yo mu isi izaherwa umugisha.” (Itangiriro 12)

Maze Aburahamu yizera ijwi, ahinduka inzererezi n’umwimukira wa buri gihe, agenda yerekeje igihugu atazi cy’isezerano. Uyu Aburahamu yabaye inshuti y’Imana ibi bituma hari ibyahindutse mu byo yendaga gukorera Sodomu na Gomora; kuko yibutse umwana wa mwene se Loti, akamusabira cyane. Nyamara iyi ntwari mu kwizera, yahuye n’ikigerageza cyatsindwa n’umugabo kigasiba undi.

Uti:

- “Byagenze gute?”

Uyu Aburahamu yahawe n’Imana umwana umwe rukumbi ageze mu zabukuru, igihe ibyiringiro byose byo guhananwa umwana n’umugore we Sara yakundaga byari bimaze gushira. None se ko Sara atari akijya mu mihango y’abakobwa kubwo gucura, yari kubyara ate? Hari mu gihe kandi: Sara yari mu myaka 80, naho umutware we Aburahamu ari mu myaka 90.

Nyamara kubw’isezerano ry’Imana ridakuka, no kubwo kwizera, Imana ibaha umwana w’umuhungu; bamwita Isaka. Mbega Aburahamu ntibyasobanuraga ‘Se w’amahanga menshi’, na Sara bikavuga ‘Nyina w’amahanga menshi’! Nyamara bitwagwa gutyo, nta mwana bafite. Kubw’imbabazi z’Imana, rero, ibaha ako kana kamwe. Ubasha kwiyumvisha ukuntu bagakundaga, bakagahangayikira. Kuri bo, ako kana Isaka kari ayo mahanga yumvikanaga mu mazina yabo.

Igicurane kuri Isaka cyari gihagije guhangayikisha ababyeyi be, kuko imitima yabo bombi yari imwihambiranyeho. None se Aburahamu na Sara ntibari babonye umuragwa w’ibyabo! Ntibyari bikirazwe Eliyezeri w’umudamasiko, nk’uko kera Aburahamu yiganyiraga imbere y’Imana batarahabwa Isaka (Itangiriro 15:3).

Reka rero, umunsi umwe, Aburahamu yumve ijwi rya ya Mana yamugendereye kera. Kandi yari amaze kumenyera kumva iryo jwi ryiza, no kuba inshuti yaryo magara ntunsige. Yari yaramuhiriye mu nzira ze zose, kandi yari yarahojeje intimba ye na Sara yo kutagira umwana.

Nyamara noneho, ijwi ry’inshuti ye yumvise rimubereye nk’inkota ikerera amara mu nda y’umuntu.

“Jyana umwana wawe, umwana wawe w’ikinege ukunda, Isaka, ujye mu gihugu cy’i Moriya; umuntambireyo ku musozi ndibukubwire, abe igitambo cyoswa.”
(Itangiriro 22:2)

Ndibwira ko Aburahamu yagize ati:

- “Ngo?”

Nk’usiganuza nyine; kuko ibyo yari yumvise byari ibitakifuzwa kumvwa, bigatera amagufa gukangarana no mu nzozi gusa. Yari atunguwe rwose. Imana ko yari izi ko Isaka ari ikinege, kandi ko nta undi wari kuvuka nyuma ye, ko ari we wari ibyiringiro byonyine bya Aburahamu na Sara by’uko amazina yabo atagombaga kuzimangana mu isi nyuma yo gucyura igihe kwabo, byari bije gute? Byari biturutse he? Mbese koko Imana, inshuti idahemuka, yavuga ibyo?

Nyamara ijwi ry’Imana ryari risobanutse neza, ibi bituma Aburahamu adashidikanya ngo akekeranye ko ahari yaba atari Imana. Mbese ntiyari amenyereye kuvugana nayo? Uko yazaga, uko yatangiraga kuvuga, imvugo yayo, ijwi ryayo, yewe n’uko yamusezeragaho; byose yari abizi. Yari yo rero. Kumenya ko ariyo, nawe ntiyabitinzeho. Ariko se ko itari yarigeze imubabaza, ikaba yari imubereye inshuti y’ukuri, ibyo byo byari bivuye he ngo imurase mu cyico, ikureho impamvu y’umunezero we?

“Umwana wawe w’ikinege ukunda Isaka.”

Si na Isimayeli, nibuze, umwana w’inshoreke, imbuto yo mu busambanyi; nubwo nabyo bitari byoroshye kuko yari imfura ya Aburahamu, akaba uwo gushobora kubyara kwe kwigaragarijeho. Oya! Ni:

- “Isaka, umwana wawe w’ikinege ukunda!” Niko ayo magambo yungikanyaga mu mutima we.

Ndakeka ko byateye Aburahamu kurwara, agashidikanya urukundo rw’Imana. Aho mbere yo kumenya icyo ari bukore, ntiyaryamye iminsi nk’itatu, ntabashe kurya, ahubwo asuhuza umutima gusa?

Kwica Isaka byari ukongera kubona Sara, umugore we yakundaga, yigunze kandi yuje umubabaro udashira, bombi bakazamanukana mu gituro agahinda kadahozwa. Ibyo kwitwa Aburahamu na Sara, hari akandi gaciro byari kuba bigifite? Nka Nawome, ndumva bari gusigara bibona bitwa Mara (Rusi 1:20), kuva batangira kubaho.

Kubera iki kwita ‘Se’ na ‘Nyina’ w’amahanga menshi ugenda ari incike? Kubera iki izina ryiza rya Nawome k’uwo Uwiteka yarwanyije? Mara niryo ryari kuba izina ry’ukuri, dore ko ubusharire bw’ikigeragezo cyabo bwari kuba bumaze kwikuba, kikaruta kuba kibi icyo bari bisanganiwe mbere cyo kutabyara. Rwose, nicyo cyari kuba cyiza ko Isaka aza kuba ataravutse kuruta kumubura ikirari bari bamaze kumushyiraho ibyiringiro byabo byose.

Umutima w’umuntu urusha ibintu byose gushukana (Yeremiya 17:9) na Satani se w’ibinyoma (Yohani 8:44), ntibabuze kumubuza amahoro muri icyo gihe.

- Ayii! Data wambyaye; ngire nte? Niko nibwira Aburahamu yibazaga yiganyira mu mutima we, akabura igisubizo.

Hakabaye nka mbere, yari gutakira Imana. None arayibaza iki? Arayitakira ate kandi ariyo imurwanya? Na se w’umubiri ataka atakira ntakiri kumwe nawe, kuko yamusigiye gukurikira iyo iri kumugerageza ubu.

- “Biragatsindwa kwikora mu nda! Byazavugwa he? Amaboko yo gukora nk’ibyo aragacika!” Wenda niko umutima we utahwemaga kumucyaha.

Ari wowe mu gihe nk’icyo wakora iki?

- “Ntube umupfu, Aburahamu. Mbese Imana ntiyakubwiye ko kuri Isaka ariho izaguhera urubyaro ruzangana n’umusenyi w’inyanja n’inyenyeri z’ijuru? None numwica bizasohora gute? Irinde!” Iyo nayo ikaba inama ya Satani.

Mbega urugamba! Gupfusha umwana wawe ukunda w’ikinege, ari wowe kandi umwiyiciye! Ukigira incike! Wabona bikugwirira atari wowe ubyizaniye. Ari wowe mu cyimbo cya Aburahamu wari kwanzura iki? Mu kuri, jye sinakwifuza kuba mu mwanya we.

Icyakora umutima wa Aburahamu wari womatanye n’Imana, nicyo cyamubashishije kwanzura kumvira Imana. Kandi mu kureba ku Mana gusa, byabashije Aburahamu gusa nk’ureba umuzuko w’abapfuye, amenya nta shiti ko Isaka nawe atazimye burundu, ko azazuka. Nibwo yemeye kwizinukwa, akumvira Imana; kandi ayiharira iby’amasezerano yari yaramubwiye, ngo izabigenze uko ishaka.

Mbese ubundi uwo mwana ntiyari yaramuhawe n’Uwiteka! Hari uwo yari yarahoranye? Ni Isaka se wari impamvu y’urukundo rwa Aburahamu n’Imana, byatuma abatandukanya? Oya rwose. Nk’inshuti, Imana yari yarahaye Aburahamu umwana; none ishimye kumwisubiza. Yakongeraho iki? Nka Yobu, asa n’uvuze ati:

“Uwiteka yaratanze, Uwiteka arishubije:
Izina rye rihabwe icyubahiro.”
(Yobu 1:21)

Aburahamu rero yatsinze ikizamini cy’Imana atyo, yemera gutamba Isaka; ariko, mu kuri, ntibyari byoroshye.

Ndamwishushanya Aburahamu azamutse umusozi Moriya, ashoreye Isaka mu rugendo rwe rwa nyuma, azi neza ko batari buwumanukane. Mbega amaso yari kurebana Sara, nyina w’umwana! Muri uru rugendo kandi, Isaka yamubajije ikibazo gikomeye.

- “Dawe! Dore inkwi n’umuriro; ariko igitambo kiri he”? Isaka abaza se Aburahamu (Itangiriro 22:7).

- “Mwana wanjye, Imana ubwayo iri bwishakire igitambo.” Icyo kiba igisubizo cya Aburahamu (Itangiriro 22:8).

Ishyire mu mwanya wa Aburahamu, ubazwe icyo kibazo n’uwo ugiye gutamba; umwana wawe ukunda, kandi w’ikinege. Mu kuri, si icyoroheye Aburahamu. Nuko yishyira mu maboko y’Imana, yiyambura icyo kubaho kwe kwari gushingiyeho, arakiyiha.

“Mwana wanjye, Imana ubwayo iri bwishakire igitambo.” Aba ariko Aburahamu asubiza umuhungu we ku kibazo kimurenze yari amubajije.

Kandi koko yishakiye igitambo! Kuko mu gihe yendaga gusogota umwana, yumvise ijwi ryo kuruhura abanesha rimubwira riti:

“Ntukoze ukuboko kuri uwo muhungu,
ntugire icyo umutwara:
kuko ubu menye yuko wubaha imana.”
(Itangiriro 22:12)

Urugero rwa kabiri :
Yefuta ahigira Imana umuhigo, ategekwa gutamba umukobwa we w’ikinege.

Tuvuge iki kuri Yefuta? Ibye twabihina dute, ko nabyo atari bigufi? Byakumvikana neza gute?

Uyu Yefuta w’umugaleyadi, yanzwe kandi yirukanwa na bene se kuko batari basangiye nyina. Yari umwana w’umugore benese batashakaga kumenya no kumva; kuko nyina yari ‘malaya’. Ni icyo gusa bari bazi, kandi nta n’ikindi bashakaga kumenya kuri Yefuta kitari iki: ‘umwana wa malaya’; nk’aho Malaya ryari ryo zina rya nyina. Mwene Malaya yajyaga kugira umugabane mu bana b’abagore bazwi gute? Nibyo bitwazaga, nk’aho bo bahisemo ubabyara. Nuko, uretse no kumwima umunani gusa, bamwirukana no mu gihugu (Abacamanza 11:2).

Nyamara, mu buhungiro, ubera igihome abameneshejwe yagumanye na we; ndetse aba umukuru w’umutwe w’ingabo zikomeye. Mbega amakuru ya Yefuta ntiyageraga ku Bisirayeli? Birumvikana ntibyabafashaga, kubera kumwifuriza kuba hasi cyane nyamara akarushaho gushyirwa hejuru. Ariko byari uko! Ikingura ntihagire ukinga (Yesaya 22:22; Ibyahishuwe 3:7) niko yari yabitegetse.

Igihe Balaki atuma kuri Balamu ngo aze amuvumire Abisirayeli, yamushubije neza ati:

“Navuma nte ab’Imana itavumye?
Narakarira nte ab’Imana itarakariye?”
(Kubara 23:8)

Mu kuri, kuvuma ab’Imana itavumye, ni ukwibabariza umutima ku busa. Bibiliya irongera ikabivuga neza iti:

“Nk’uko igishwi kijarajara n’intashya uko iguruka,
niko umuvumo w’ubusa utagira uwo ufataho.”
(Imigani 26:2)

Reka rero igihe kimwe Abamoni batere Abisirayeli, babajujubye, habure uwo kubahagarara imbere! Erega nta cyari gisigaye ngo babe abaretwa b’Abamoni! Nibwo bibutse ‘umwana wa Malaya’.

Batuma kuri Yefuta, bati:

“Ngwino uturangaze imbere mu rugamba turwana,
ube umugaba wacu, tubone kurwana n’Abamoni.”
(Abacamanza 11:6)

Nuko ibiganiro n’umwana wa ‘Malaya’ byashobotse.

Ndi kwibwira ko Yefuta atahise yitabira ubutumire, ko yabanje kubima amatwi rwose; kubera ko ahari yari yarabasibye muri we, anisibamo isano afitanye n’igihugu yitaga icye ariko cyo kikaba kitari cyarigeze kumwemera nk’uwacyo. Muri uwo murongo, ibiganiro bivamo imishyikirano, maze imishyikirano ibyara amasezerano.

Nuko basezerana na Yefuta ko nabarangaza imbere mu rugamba, bakanesha, azaba umutware wabo bidasubirwaho (Abacamanza 11:8-10). Hehe no kuzongera kumwita ‘umwana wa Malaya’!

Nuko Yefuta ahigira Imana yo mu ijuru umuhigo:

“Nungabiza Abamoni, ngatabaruka amahoro, ikizabanza gusohoka imbere y’umuryango w’inzu yanjye kunsanganira kizaba icy’Uwiteka; nanjye nzagitambaho igitambo cyoswa.”
(Abacamanza 11:30-31)

Ku rugamba, uko Yefuta yabyifuje, akabisaba Imana, niko byose byagenze nta kibazo. Ikibazo rero cyaje kuba mu guhigura.

Dore uko Bibiliya ibivuga:

“34. Nuko Yefuta aratabaruka, ajya iwe i Misipa. Yenda kugera iwe, umukobwa we asohokana utuntu dusa n’ishako, abyina, ajya kumusanganira; kandi uwo mwana yari ikinege, nta muhungu cyangwa umukobwa wundi yari afite atari we.
35. Amubonye, ashishimura imyenda ye, aravuga ati: ‘Ye baba we, mwana wanjye; ko umbabaje cyane? Ko uri mu bampagaritse umutima? Kuko nahigiye imbere y’Uwiteka; none simbasha kwivuguruza.’
36. Aramubwira ati: ‘Data, ubwo wahigiye imbere y’Uwiteka, mpigura nk’uko wahize; kuko Uwiteka yaguhoje ababisha bawe b’Abamoni.” (Abacamanza 11)

Mbega iki kigerageza kiroroshye? Gutahukana intsinzi yo ku rugamba utahiye ku kigandaro cy’umwana wawe ukunda, byongeye w’ikinege? Ni uwuhe munezero wagira w’iyo ntsinzi? Ni ukuri, ni ikibazo.

Byakabaye ari no gusanga umwana wawe yishwe n’urundi rupfu, kuko ari ryo herezo ry’abafite umubiri; wamuririra nk’abandi, ugahora. Ariko kumwiyicira kandi ubohotse mu mutima wawe, utaboroga cyangwa ngo unihe, ahubwo wishimye kubera ko ari igitambo utambiye Uwiteka! Ahaa! Bakiranuka kwinshi. Ari wowe mu mwanya wa Yefuta, wakora iki? Ndi imbere y’Imana, sinifuje kuba mu mwanya we.

Mu mwanya wa Yefuta, hari abari gukora imibare, bakishingikiriza ku byabaye kuri Aburahamu, maze bagashuka Imana bishuka mu mitima yabo ko bemeye gutamba uwo mwana wabo w’ikinege, bibwira bati:

“Imana iri buze kwishakira igitambo.”

Mbega ntibari kugira ikibazo babanguye ukuboko ngo basogote, kugahera mu kirere, banze kukumanura, bategereje ijwi batazigera bumva ribabwira ngo:

“Rekera aho, namenye ko unkunda!”

Kimwe cyo gukomeza abashaka ibyitegererezo byo kwizera, nuko Yefuta yanesheje ikigerageza kigoye gityo, agahigura Imana nk’uko yayihigiye.

Ariko, byashobora bangahe kwemera kwima ingoma uri incike, ngo ni ukugendera mu bushake bw’Imana, ukabigurana ubuzima bw’umuragwa w’ibyawe kandi ari we nawe ubwawe muri ibinege? Mbega icyo cyubahiro cyo kwima ingoma hari agaciro cyagira mu bimeze nk’ibyo? Ibyo waba uruhira byose, ukabigeraho, uba uzabiraga nde (Umubwiriza 4:8)?

Ngibyo ibigerageza by’Imana. Ntibikunze kubaho, ariko biza ari injyanamuntu.

Ibigerageza bya Satani, ukuntu biba byinshi, bibaye biteguye ku buryo bw’ibigerageza by’Imana mu ijuru hazabonekayo mbarwa, ibyicaro byinshi byaho bikabura ababijyamo. Imana ishimwe rero kuko nubwo umwanzi wacu Satani ari umugome, umwami Yesu twiringiye yamumennye umutwe; bituma nta bitekerezo bihambaye akigira byo kudutegurira ibitugerageza byarenga ibyo abana b’Imana twakihanganira (1 Abakorinto 10:13).

Hari ibigerageza rero by’uburyo butatu:

(i) Ibigerageza umuntu yizanira ku giti cye;
(ii) Ibigerageza umuntu azanirwa n’Isi na Satani;
(iii) Ibigerageza umuntu azanirwa n’Imana.

Ibigerageza umuntu yizanira ku giti cye biramusenya kuko nta kimuhumuriza kiba kiva mu mutima we; ahubwo aba yirega ubuswa, ubwenge bucye, kutareba kure, n’ibindi byinshi. Nyamara iyo arenze aka kazitiro ko kwibabarisha kutibabarira, agaca bugufi imbere y’Imana yemera ko ari umuntu gusa ushoboye bike nabyo ashobozwa n’ubuntu n’imbabazi by’Imana gusa, agatekereza neza ikindi yakora kandi agatakira Imana ayingingira kumubabarira no kumutabara, ni ukuri Imana ntijya imureka; ahubwo iramutabara (Luka 18:7-8).

Ibigerageza umuntu azanirwa n’Isi na Satani, bimusenya bijyanye n’uko bimusanze. Mbese si nka ya mivu n’imiyaga birwanira ku nzu ngo biyisenye? Iyo itubatse ku rutare rw’ukuri, gusenyuka kwayo kuba kunini (Matayo 6:24-27).

Cyangwa se, si nka za mbuto umubibyi abiba hose anyuze (Matayo 13:1-8)? Uko izuba ritwika imbuto zo ku kara kubera kutagira imizi ihamye mu butaka, cyangwa uko amahwa aniga izahabiye muri yo, niko ibigerageza by’isi na Satani bigirira udafite ubutunzi bw’ijambo ry’Imana muri we, ngo abe ateye muri ryo.

Ariko ufite ijambo ry’Imana muri we, mu kigerageza cyose azanirwa n’Isi na Satani, yumva hakomeza kwiyungikanya muri we amagambo atangirwa n’iri ngo:

"Handitswe ngo: [...]" .

Hehe? Mu ijambo ry’Imana. Bityo, akanesha. Mbese si ko Yesu yatsinze Satani, igihe amufatiranya n’inzara mu butayu (Matayo 4:1-11)? Niyo ibigerageza bibaye urugamba rurambye kandi, ntirubakura mu byimbo ngo rubahinyuze; ahubwo bishingikiriza ku Mana, kugeza umuseke ubatambikiye (Habakuki 2:1; 3:17-18).

Kandi, ku iherezo rurarangira. Nibyo! Kuko nta mvura idahita, kandi nta joro ridacya.

Nicyo gituma abantu b’Imana bakwiriye kurya ibyo kurya by’ijambo ry’Imana, bakagira ryinshi muri bo; kugirango ribashe kubakirisha ku munsi mubi (Abefeso 6:13).

Ibigerageza umuntu azanirwa n’Imana byo, biri ukundi. Mbese ingero z’abageragejwe n’Imana twabonye, ntizibigaragaza? Niba inyubako igiriye ibibazo muri fondasiyo, mbega kugwa kwayo ntikuba kuri bugufi!

Mu bimeze nk’ibi niho umwanditsi wa Zaburi yagize ati:

“Imfatiro zishenywe,
umukiranutsi yakora iki?”
(Zaburi 11:3)

Kandi, impamvu nyayo iraboneka. Mu bindi bigerageza, umuntu yitabaza Imana ikamutabara, nk’uko yabisezeranye iti:

“Maze nutabaza, Uwiteka azagutabara;
nutaka, azavuga ati: ‘ndi hano.’”
(Yesaya 58:9)

Kandi ahandi yagize iti:

“Ntabaza ndagutabara,
nkwereke ibikomeye biruhije utamenya.”
(Yeremiya 33:3)

Yitabaze rero uri inshuti yayo nka Aburahamu (Itangiriro 18:17-19), ukagira ubuhamya buzima imbere yayo nka Yobu (Yobu 1:8). Haba hagushije ishyano ikintu cyose cyahagurutswa no kukurwanya. Kuko ubwayo yabihamije, iti:

“Ubakoraho
aba akoze mu mbone y’ijisho ryanjye.”
(Zekariya 2:8)

Kandi ahandi igira iti:

“Kuko wambereye inkoramutima, […]
nicyo kizatuma ntanga ingabo zigapfa ku bwawe,
n’amahanga nkayatangirira ubugingo bwawe.”
(Yesaya 43:3)

Reba rero nawe noneho inshuti yawe wishingikirizagaho, imbaraga zawe nsa, ari we uhagurukiye kukurwanya! Ko wariho kubera we se, none ubu akaba ahagurukijwe no kukurwanya, uratakira nde? Mbese watakira abasanzwe ari abanzi bawe, mu gihe inkuru y’ibyawe ibatera kumwenyura mu mutima (Zaburi 55:12-13)? Banemeye kugutabara kandi, amaboko yabo yaba nk’ibikenyeri mu muriro imbere y’uwo waba uguhagurukiye.

Ibigerageza umuntu azanirwa n’Imana, ni ibikomeye rwose. Intwari zikomeye gute, iminsi itagabanijwe, zagwa k’urwo rugamba. Ntubona se Belushaza? Yari yaratigishije amahanga menshi ate, kubwo kuyobora igihugu cy’igihangange kandi gitinyitse, uwo giteye ntacyo kukimukiza kiboneka. Nyamara Imana ngo imushyire ku munzani wayo, isanga ntacyo apima. Nibwo ikiganza cyayo kimwandikiye ku rukuta mu birori yari yatumije, ngo hato bitagira uwo bihishwa. Nibyo! Ngo bose babimenye.

Kiti:

“Mene Mene Tekeli Ufarisini.”
(Danyeli 5:25)

Muri ayo magambo bose basomaga ariko ntibagire icyo batoramo, harimo iri rikangaranye: Tekeli; risobanurwa ngo:

“Wapimwe ku bipimo
ugaragara ko udashyitse.”

Nko kuvuga ngo:

“Mu maso y’abantu uri igihangange,
mu maso yanjye uri ubusa”.

Cyangwa se, ngo:

“Ku bantu uri akadaterurwa,
ariko kuri jye uri ibaba”.

Abantu barwana intambara nyinshi rero, ariko hakaba urugamba rubakoraho. Nibyo! Habaho urugamba ruhitana abajenerali, abakoroneli bakarugwaho, intwari mu ntambara zikahashirira; ibyo byose nyamara kandi urugamba rwendaga kurangira.

Niko ibigerageza by’Imana bibasha kumerera benshi bari ibihangange mu ntambara nyinshi barwanye n’Isi, Umubiri na Satani. Kuki bibaho? Imana ifite impamvu zayo. None se nayigisha impaka? Ahari, aba ari ukugira ngo igukuze mu by’umwuka.

Sinabasha kuvuga ko ari ukugira ngo imenye ko uyikunda by’ukuri, kuko ntacyo ihishwa. Nibyo! Petero niwe wahamije neza ati:

“Mwami, umenya byose,
uzi kandi ko ngukunda.”
(Yohana 21:19)

Keretse bibaye gusa kugaragariza abantu ko uyu n’uyu akunda Imana by’ukuri (bityo bikamubera ubuhamya ku bandi), cyangwa se kumucisha bugufi no kumutamaza mu bandi (kubera kwibona cyangwa se kwishushanya ku bantu); naho ubundi nta gishya ku Mana iba itazi yaba ishaka kumenya; kuko imenya byose (Zaburi 50:21).

None, umuntu yakifata ate mu bigerageza by’Imana? Inama nziza, ni ukwishyira mu maboko y’Imana, igakora gushaka kwayo kose. Dawidi mu bimeze nk’ibyo niwe wabimenye neza, aranzura ati:

“Reka nigwire mu maboko y’Imana.
Kuko yo ari umunyembabazi nyinshi.”
(1 Ngoma 21:13)

Kandi koko, igira imbabazi; ndetse, iturusha imbabazi. Nibyo! Kuko yo iyo ikomerekeje iranomora, yateza inzara mu gihugu igategeka n’aho guhahira (2 Samweli 24:14). Kandi naho Uwiteka yababaza umuntu, arahindukira akamugirira ibambe (Amaganya ya Yeremiya 3:21-36).

Icyakora utarabona ibimeze bityo, itoze gusenga uti:

“Uwiteka Imana,
Se w’Umwami wacu Yesu Kristo;
ntutujyane mu bitugerageza.”

Ni iby’ukuri ko nyuma y’ikigerageza cy’Imana, iyo ukivuyemo ugitsinze, Imana iragukuza muri byinsi nk’uko umusilikari utsinze urugamba rukaze ahabwa ipeti rirengeye. Ni byiza cyane. Ariko, tekereza neza: uruguyeho?

Ni abasilikari bangahe bajya bakora urugendo rwo gutsinda urugamba, hejuru y’imirambo myinshi y’intwari zabo zaruguyeho? Bityo hagakuzwa abatari bakwiye, intwari n’ibihangange batakiriho. Ni ukuri, mu bimeze nk’ibi, niko dusoma muri Bibliya:

“Imbwa nzima iruta intare ipfuye.”
(Umubwiriza 9:4)

Biramaze kuzagera mu ijuru udafite ubuhamya butigisa abantu, kuruta kuba igitangarirwa mu bantu kubw’ubuhamya n’imirimo byawe, nyamara amaherezo ukazagwa ku rugamba, ntuzakore urugendo rw’abanesheje, urugamba rushize (Mariko 9:43-48).

Ngaho rero, jya usenga uti:

“Ntutujyane mu bitugerageza.”

Kandi uti:

“Ntuduhane mu bitwoshya.”

Ubundi, Uwiteka abigenze uko ashaka; kandi, adukize umubi. Nibyo! Adukize umubi mu minsi (uwo mubi) ashigaje yo kuzerera mu isi, ye kuduconshomera (1 Petero 5:8); adukize umubi mu gihe ahagurukijwe no kuturwanya (Yakobo 4:7; 1 Petero 5:9), bityo tubashishwe gukomera no kurokoka ku munsi mubi (Abefeso 6:13).

Kuko iminsi yose atari ku cyumweru (nk’uko bavuga); kandi mu mibereho ya mwene muntu, uwo ari we wese, habaho ubwo ageze mu munsi mubi.

Kuri buri umwe umwe, habaho umunsi mubi. Hakaba n’ubwo uwo munsi mubi utagaragaje ibyiringiro byo gushira, ugafatira iminsi, ibyumweru, amezi cyangwa imyaka. Iyo minsi y’umubi itagabanijwe, ni nde wajyaga kurokoka (Matayo 24:22)?

Yesu, udukize umubi.

Mwuka Wera w’Imana, utubashishe gukomera ku munsi mubi (Abefeso 6:13).

Imana Data wa twese, ntuduhane (ntutujyane) mu bitugerageza (bitwoshya); ahubwo udukize umubi.

Aho abemerewe gupiganwa barangirije ibizamini twuriye imodoka dusubira ku mashuri twari twaturutseho, tujya kwitegura ibizamini byo kurangiza umwaka n’amashuri yisumbuye.

Agahinda kanjye karushijeho kuba kenshi aho basohoreye ibyavuye mu mapiganwa: ku kigo cyacu, uwari uwa mbere yahawe kujya kwiga mu Bubiligi, uwa kabili n’uwa gatatu bahabwa kujya kwiga mu cyahoze ari Leta Zunze Ubumwe z’Abasoviyeti.

- “Ni iki kivuga ko jye bitari kungeraho, iyo nkemererwa gupiganwa?” Niko nibazaga muri jye, ndwana n’agahinda ko mu mutima.

Igihe kihuse kugenda, dukora ibizamini bisoza umwaka, turarangiza baduha dipolome zacu; nk’uko byari bisanzwe, bampa dipolomu ya 4 muri iryo shami ry'Imibare n'Ubugenge“Math-Physique”, mu kigo cy’Urwunge rw’Amashuri rw’i Butare. Cyari ikintu kinini, cyo kwishimirwa; ariko dore sinari nishimye rwose.

Mu ruhande rumwe, agahinda ko kubura buruse yo kujya kwiga mu mahanga ntikashakaga kunshiramo.

Mu rundi ruhande ariko, kwibaza ibigiye gukurikiraho kuri jye byari bimbereye ikindi kibazo kingoye, nareba imbere nkabona umwijima gusa.

Igihe cyo guterurwa mu maboko cyari kirangiye kuri jye nyamara ntiteguye kwiterura. Nabonaga icyaro nasize ngiye gusubiramo, nta gutegereza kandi ngo ibiruhuko birashira nsubire ku ishuri. Najyaga kuba iki, muri icyo cyaro? Najyaga kubaho gute? Byari ibibazo ntabonera ibisubizo.

Nibyo koko imbere yanjye hari hakiri amahirwe yo kwemererwa kujya kwiga muri Kaminuza y’igihugu; nyamara kandi kuyijyamo kwanjye nabyo ntibyangaragariraga.

Ku ruhande rumwe, hari ikibazo cyo kubona buruse ya Leta ngo mbashe kwiga. Icyo gihe babanzaga gusohora urutonde rw’abemerewe kwiga muri Kaminuza hakurikijwe amanota bafite, hanyuma bagasohora urundi rutonde rw’abemerewe inkunga ya Leta yari igizwe n’amafaranga babahaga buri kwezi yo kwitunga no kugura ibikoresho by’ishuri. Nari ndangije umwaka wa nyuma w’amashuri yisumbuye ntishyuye amafaranga y’ishuri nyuma yuko ababyeyi banjye bari bamaze gushirirwa n’ubushobozi bwo kunyishyurira; bituma nigira ku ideni, nyuma yo gusinyira ikigo ko nzahabwa dipolomu yanjye aruko maze kwishyura iryo deni. Ntibyajyaga kunshobokera rero kwimenya kuri byose muri Kaminuza, mu gihe najyaga kutibona ku rutonde rw’abemerewe inkunga ya Leta.

Ku rundi ruhande ariko, hari ikibazo cy’abavandimwe banjye bari bakiri mu mashuri kandi nabo bakwiriye kwiga. Mushiki wanjye umwe yari ari mu myaka yo hasi mu mashuri yisumbuye, mu gihe ababyeyi kandi bari bamaze kunanirwa kumwishyurira rwose. Ubwo kandi niko hari n’abandi bakiri mu mashuri abanza, ndetse bamwe bari bugufi bwo kuyarangiza no gukora ibizamini bya Leta. Hari ihitamo rero: kwirebaho gusa no gukomeza urugendo rwanjye muri Kaminuza, cyangwa kwitangira abavandimwe, nkareka Kaminuza ngashaka akazi; bityo nkishyura ideni nari mfitiye ikigo nizeho kandi nabo nkabafasha kwiga nibura ayisumbuye nk’uko nanjye ababyeyi bari baranyitangiye.

Narabyibukaga, hari byinshi ababyeyi banjye bigomwe ndetse banabigoma abavandimwe bose kugirango nige; cyari igihe kuri jye nanjye kwitangira bene mama. Nuko nanzura kureka Kaminuza, uko byari kugenda kose, no gushaka akazi.

Mu gihe cyanjye, akazi kariho ku wize wese kari ako kwigisha mu mashuri abanza. Indi mirimo yo mu butegetsi bwite bwa Leta yari ingume, itabonwa n’ubonetse wese. Keretse ko uretse icyubahiro cy’akazi, umushahara wari umwe kuko ibyo bihe umuntu yahemberwagwa dipolomu ye, atahemberwagwa icyo akora. Muri iyo mpeshyi rero, nubwo ntari narigeze ntekereza kuzigisha ndangije kwiga, nagiye gusaba Umugenzuzi w’amashuri akazi ko kwigisha, nyamara nawe arakanyima. Yambwiye ko adashobora gukora ikosa ryo kumpa ishuri nigishamo, kuko ngo abantu bize mu mashami nk’iryo nari narizemo yamararaga kubaha amashuri, nta kwezi cyangwa abiri bayamazemo, bagata abana bigiriye gukomeza muri Kaminuza; nuko bikamubera ikibazo kubona ababasimbura, ari nako abana bahadindirira.

Mbese ntiyari afite ukuri? Yari afite ukuri rwose; ariko dore uko kuri kwe ntacyo kwamfashagaho; nashakaga akazi. Namusobanuriye ko nta gahunda mfite yo guhita njya muri Kaminuza kubera ibibazo by’amafaranga nari mfite, ariko kubimusobanurira biba nko kubwira umuntu ururimi atumva.

Ibiruhuko by’abanyeshuri bijya kurangira, ubugenzuzi bw’amashuri abanza bwatangaje abarimu bari gukora muri uwo mwaka, ibigo n’amashuri bari kwigishamo, maze izina ryanjye ntiryahamagarwa; umugenzuzi w’amashuri yari yarakomeye ku ijambo yambwiye.

Aho amashuri atangiriye, abanyeshuri bo mu makuru n’ayisumbuye bahetse ibikapu byabo basubira mu mashuri bigagamo, abarimu bo mu abanza begura ingwa basubira kwitaba iperu ryabo ku mashuri bari boherejweho, abahinzi nabo begura amasuka yabo bashoka imirima kuko ibihe by’ibiba byari bibandanije; nuko nisanga mu bwigunge muri icyo cyaro, kandi mu bukene butagira kibara. Kandi by’ukuri nari nkennye rwose, aho no kubona isabune yo kumesa utwenda twanjye byari bigoye; Ubushobozi bucye ababyeyi bari bafite bari basigaye babukoresha kuri mushiki wanjye wari uri mu yisumbuye, ari nako bamufatiraho indi myenda ngo ibunganire mu kumwishyurira.

Mbere y’iryo shuri ry’ubushomeri muri iyo si itaragiraga icyizere cy’ejo impa, mu biruhuko najyaga njyana n’ababyeyi mu mirimo itandukanye yo mu murima, kandi nari nyishoboye. Aho nisangiye jyenyine muri icyo cyaro, narongeye mfata isuka nkurikira ababyeyi mu murima. Ariko kubera kwihebura no kutiyumva muri iyo mirimo, nabyo birananira rwose; nuko ntangira kujya nirirwa mu rugo jyenyine, mperanwa no kwigunga no gusuhuza umutima.

Muri Bibiliya dusoma ngo:

“Umutima w’umuntu urusha ibintu byose gushukana,
kandi ufite indwara, ntiwizere gukira:
ni nde ushobora kuwumenya uko uri?”
(Yeremiya 17:9)

Muri ubwo bwigunge, namenyereye kuganira n’umutima wanjye, yo nshuti nari nsigaranye, nuko nkawugisha inama. Igihe kimwe umutima wanyibukije ibyambayeho kera nkiri umwana. Nigenderaga mu nzira, nuko nza gutoramo ibiceri by’amafaranga y’u Rwanda 20. Nari nshonje, mbasha kuyaguramo utuntu two kwica inzara, nkomeza urugendo rwanjye. Ngibyo ibyo umutima wanyibukije.

- “None se ko ari akahise! Iyaba nari nyatoye ubu.” Aba ariko mbwira umutima wanjye kuri ibyo wari unyibukije.

- “Ariko ntiwayatoye mu rugo! Wayatoye mu nzira.” Aba ariko umutima ushimangira.

Nuko nunguka inama yo gusubira mu nzira gutyo, nizera ko nabasha gutoramo amafaranga. Najyaga ngendera inzira ubugari, ntafite iyo njya hahamye, ahubwo ntumbiriye inzira. Ibyo bihe, haba ubwo nahuraga n’abantu simenye ko twahuye, abansuhuje nkabikiriza ntahari rwose; ntumbiriye inzira, ngo hato ntanyura ku bisubizo. Nyamara dore nta muntu wari ugita amafaranga, biti ihi se mu nzira nabaga ndi bunyuremo. Mara iminsi mike ngira ntyo, ncitse intege nongera niyicarira mu rugo.

Ikindi gihe, umutima urongera uranganiriza.

- “Uribuka bya bihe ugendera inzira ubugari mu cyizere ko amahirwe yagusekera ugatoramo amafaranga?” Aba ariko ijwi ry’umutima rimbaza.

- “Yego ndabyibuka. Nibuka neza ko nta n’urutoboye nabashije kuzibonamo; nta bantu bagita amafaranga.” Aba ariko nsubiza.

- “Icyo gihe ntiwamenyaga abo mwahuye, yewe dore kenshi na kenshi ntiwumvaga n’abagusuhuje!” Umutima aba ariko unyibutsa.

- “Najyaga kubamenya cyangwa kubumva gute? Amaso yanjye n’ibitekerezo byanjye byose byari ku nzira, ngo ntanyura ku mahirwe.” Aba ariko nsubiza.

- “Burya aho harimo ikosa! Iyo ukibasha kwita kubo muhura, ugusuhuje ukamwikiriza, ukubajije amakuru ukayamubwira nyine; ntihari kuburamo ukorwaho akagira icyo aguha.” Aba ariko ijwi ryo mu mutima rimbwira.

Nguko uko nasubiye mu nzira; noneho ntagiye gutumbira inzira, ahubwo ngiye kureba abantu. Nyamara kandi Bibiliya yo iravuga ngo:

“5 Havumwe umuntu wiringira undi muntu, akishima amaboko ye, mu mutima we akimura Uwiteka.
6. Azaba ameze nk’inkokore yo mu butayu, kandi icyiza nikiza ntazakibona, ahubwo, azatura mu gihugu cy’ubukuna kidaturwamo.” (Yeremiya 17)

Ni mugisha ki najyaga kubonera muri iyo nzira yo guhanga amaso ku mwana w’umuntu? Abaca imigani babivuze ukuri, ngo “inzira ntibwira umugenzi”.

Muri ibyo bihe uwo twahuraga akansuhuza, naramwikirizaga (kuko nabaga namwumvise); nuko yambaza amakuru, nkayamubwira nyine (uko umutima wari wangiriye inama). Nkayamutangirira yose, ukuntu nagarukiye bugufi bwo kujya kwiga mu mahanga, uko narangizanyije amanota meza yakagombye kugira ibyo ampesha nyamara n’umugenzuzi w’amashuri akaba yaranyimye akazi. Ubwo nkayavugana iterambabazi, nizigiye ko bimukora ahantu akansigira akantu. Mu gahinda kanjye, nayarangiza akambwira ngo:

- “Genda wihangane, Imana izagufasha.”

Ubwo kandi akaba ansezeyeho! Nkamukurikiza amaso, ibyiringiro nari mufiteho bikaminukana nawe.

Aho naho sinahatinze kuko nahabuze igisubizo, keretse kunyongerera agahinda gusa. Umwe niwe waririmbye ngo:

“Najyaga njya ku iriba ry’iyi si
mfite inyota nyinshi cyane;
Naba ngiye kunywa agakama ubwo,
nuko nkayabura nkiheba.”

Muri kwa gushukana kwawo, umutima wanyoboraga ku isoko yakamye kera; kuhagera nkahabura amazi nari nizeye kuhashirira inyota, byansigiraga umwuma, bikarushaho kunyongerera kwihebura.

Mu kuri, uwo musozi sinawutinzeho igihe kirekire; ariko agahinda n’intimba nahoranaga by’ibyo nabuze byiyongeraga ku kureba imbere nkabona umwijima gusa, byatumaga umunsi umwe umbera nk’umwaka wose, bwacya mu isi yanjye bugatinda kwira ngo ijoro rimpishe amaso y’isi, bwakwira ijoro ry’isi rikiyongera kuryo mu mutima wanjye maze nkarushaho kwihebura mbonye ko ritinze gutandukana. Nari narakuwe mu mahoro rwose, ubuzima nta cyiringiro bwampaga.

Igihe kimwe rero, ahingutse hamwe n’ababyeyi, mushiki wanjye umwe witwa Vestine ansanga aho nari nicaye nigunze, andarikira kujyana nawe mu giterane cy’amasengesho bari bafite ku itorero ryabo. Hari kuwa kabiri tariki ya 24/09/1991; ni umunsi ntazibagirwa, kuko wampaye ibindi byiringiro, uzana umucyo w’iteka mu buzima bwanjye.

Uwo mushiki wanjye yari amaze igihe kirenga umwaka yarabaye umupentekoti; kubw’icyo, yahoranaga intambara zo kutishimirwa n’ababyeyi, ndetse nanjye namuremerereshaga umutwaro w’ubuzima kurushaho.

Sindi kukubwiriza idini, ahubwo ndaguha ubuhamya bw’uko nahuye n’Imana. Kuko idafite inzira imwe gusa! Sawuli waje kuba Pahulo yahuriye nayo mu nzira ijya i Damasiko aho yari ajyanywe no gutoteza abakristo (Ibyakozwe n’Intumwa 9), nyamara Koruneliyo we imusanga iwe mu cyumba asenga (Ibyakozwe n’Intumwa 10). Kuki Yesu uwo atafatiye Pahulo iwe mu cyumba, nk’uko yabigenje kuri Koruneliyo? Nanjye rero twahuriye mu bapentekoti, binyuze mu kurarikwa n’umuvandimwe wanjye.

Andarika, byagaragaraga mu maso ye ko nta cyizere cy’igisubizo cyiza yari afite, keretse ko yari yiteguye ko mbasha kumubwira nabi, yewe no kumusimbukana. Mu gutungurwa, mpita mwemerera; musaba gusa kumpa akanya gato ko gukaraba ubundi tukajyana.

Byagenze gute, ngo nakire neza ubutumire bwe? Mu buzima bwanjye, sinakundaga abapentekoti. Mu maso yanjye, bari abantu birarira ibitangaza bitabaho bihimbaza gusa, kandi bakavuga ko Imana ijya ivugana nabo mu gihe ntayavuganaga natwe mu idini ryacu; ibyo byasaga n’ibimbwira ko bemeza ko bafite Imana, ko twe ntayo dufite uretse kuyivuga tutayizi. Mbega kuntumira ntibyari bihagije ngo binzamurire uburakari banteraga? Nyamara hamwe n’ubwo butumire, ya nshuti yanjye twagumanye mu bwigunge bwanjye iraseruka.

- “Ese ntuzi abapentekoti?” Ijwi ry’umutima rirambaza.

- “Ndabazi!” Nihutira kurisubiza.

- “Bavuga ko bafite Imana hagati muri bo, kandi ko ibakorera ibitangaza. Mwemerere mujyane, niba bafite Imana koko nawe uyisabire akazi.” Iba indi nama y’umutima wanjye.

Uwo mugoroba rero twarajyanye; yari andaritse kujya gusenga, naho jyewe njyana indi ntego: kujya guhura n’Imana y’Abapentekoti, niba koko bayifite, no kuyisaba akazi.

Kuva nabaho nari ntarakandagira mu rusengero rw’abapentekoti, kuko tutavugaga rumwe; sinabakundaga rwose. Uwo mugoroba mpageze, nabonye urusengero rw’inzu ndende kurusha nk’inshuro nibuze ebyiri urusengero rwo mu idini ry’iwacu, nyamara kandi nsanga abantu bamaze kurwuzura ndetse abandi b abyiganira mu madirishya ngo babashe guhoza amaso ku biberamo imbere. Icyo cyarantangaje mu ruhande rumwe, nyamara kandi kiranambabaza.

Cyarantangaje kuko ku rusengero rwacu tutari twakabasha guhuza abantu bangana gutyo ku cyumweru, ariko none dore ku bapentekoti ho bari bahari mu minsi y’imibyizi.

- “Ku cyumweru hateranira abangana iki?” Sinibujije kwibaza; kuko nari ntangaye, kandi ntunguwe rwose.

Cyarambabaje kandi, kuko nibwiye muri jye ko abo bantu benshi gutyo nta kindi kibahuruza uretse kuza kwirebera Imana. None dore nari nakererewe, ntari bubone n’aho kurebera mu idirishya uretse no kwicara mu rusengero imbere; najyaga kuyibona gute?

Ndi muri ayo majune ariko, igitangaza cyarakoretse. Nagiye kubona mbona umwe mu bagabo b’aho ku rusengero aje ansanganira n’ubwuzu bwinshi, nuko ansuhuzanya urugwiro.

- “Ikaze, mushyitsi muhire!” Aba ariko ambwira ansuhuza.

Yabwiwe n’iki ko ndi umushyitsi, muri abo bantu benshi gutyo? Wenda yari anzi jye ntamuzi; ariko sinabitinzeho kuko umutima wari usubiye mu gitereko, mpawe amahirwe yo kubona akanya mu rusengero. Nuko amfata akaboko, ancisha mu mubyigano w’abantu, anjyana imbere kandi anyereka aho kwicara ku ntebe yari hafi y’iz’abayobozi.

Numvise ndushijeho kwiruhutsa, kuko mu mutima nibwiye nti ‘niba koko abapentekoti bagira Imana hagati muri bo, niza kwakira ibyifuzo nta kabuza irahera ku bayobozi imbere; nanjye nicaye hafi y’abayobozi, bityo ndaba mu bambere kuyibona no kuyibwira icyifuzo cyanjye’. Nta kindi nifuzaga uretse kimwe gusa: akazi.

Nari nkeneye akazi ngo nikure mu bucyene bwangashaga umutima bugakura umucyo ku maso yanjye. Nari nkeneye akazi kandi ngo mbashe gutura ababyeyi umutwaro wo kurihira bene mama, kuko byari bimaze kubabera akadaterurwa rwose.

Nk’aho ari jye wari watindije iteraniro, nkimara kuhagera no kwicara naryo ryahise ritangira. Umuyobozi w’urwo rusengero ari nawe wari uyoboye ayo masengesho, Pasteur Yohani Rugerinyange, yavuze ijambo rikomeye ryakoze ku mutima wanjye, rimpesha kuba muri uwo mwanya by’ukuri.

Yaravuze ati:

- “Ndabwira wowe winjiye bwa mbere muri uru rusengero; ahari waje uraritswe, cyangwa waje kwirebera gusa. Witonde! Kuko Pentekoti si idini nka rya rindi ryawe ubamo; Pentekoti ni umuriro ukongora.” Aba ariko uwo mwigisha avuga, mu gutangira icyigisho cye.

Kandi arakomeza ati:

- “Ndagira ngo nkubwire: muri Pentekoti hari Imana; kandi nuba maso, urabona Imana.”

Nari ninjiye bwa mbere muri urwo rusengero ku murariko wa mushiki wanjye, yewe ni nabwo bwa mbere nari ngiye gusengera mu bapentekoti. Numvise ayo magambo ari jye agenewe rwose.

- “Muri Pentekoti hari Imana; kandi nuba maso urabona Imana!” Niko ayo magambo yakomezaga kwisubiramo mu matwi yanjye.

Nuko ngambirira kuba maso; kandi rwose mba maso.

Kubera kuba maso ncunze ngo Imana itaza ndangaye ikancaho, byampesheje kuba muri ayo masengesho by’ukuri. Indirimbo zose zaharirimbiwe narazumvise ijambo ku rindi, ubuhamya bwose bwahatangiwe ndabukurikirana, ndetse n’ijambo ry’Imana ryose ryigishijwe n’abigisha batandukanye ntiryampitaho. Nakozweho n’ikibwirizwa cyatanzwe ku nkuru y’umupfakazi warimo umwenda (2 Abami 4:1-7).

Uwo mupfakazi, niko Bibiliya itubwira, ngo umugabo we yari umuhanuzi, nyamara kandi apfa amusigiye umwenda yari ataragashobora kwishyura. Hatambutse igihe nta bwishyu, uwari uberewemo umwenda nibwo yanzuye gufata abana babiri b’uwo mupfakazi ho abacakara mu ngurane y’uwo mwenda. Nyuma y’umwambi yarashwe ukamusiga ari igisenzegeri mubyo gupfusha umugabo, noneho inkota yari imusogoswe mu cyico mu cyemezo kitabonerwa gitangira cyo kumukuraho abana be; batanagiye kuruhuka, ahubwo bagiye kuruha by’iteka. Nuko mu marira menshi, atakira umugaragu w’Imana Elisa.

Umwigisha yaravuze ati:

- “Muri icyo gihugu harimo abakire bashoboraga kwishyurira uwo mupfakazi umwenda, ntibagire n’icyo bihungabanya ku itunga ryabo. Nyamara uwo mupfakazi sibo yatakiye; ahubwo atakira umugaragu w’Imana Elisa, utarabonekagaho igisubizo mu bigaragarira amaso.”

Nuko arakomeza ati:

- “Ndabizi ufite ibibazo bikuruhije, kandi ntako utagize ngo ubone igisubizo ariko birushaho kuba bibi. Yewe watakiye n’abantu, kandi ntawe utabwiye ibyawe; ariko nta gisubizo wabonye. Dore igitumye urushye, nuko utamenye utanga ibisubizo”.

Ni iki ntari narakoze, ngo nisayure? Ninde namenye ntari naratakiye? Ariko nta gisubizo nari narabonye, kuko binyuranye n’uriya mupfakazi sinari naramenye utanga ibisubizo. Imyaka yose namaze mu idini nigisha iby’Imana, nari ntayizi; nari Minani, kubyo kumenya Yesu.

Umwigisha yavuze byinshi. Mu gihe yarimo yigisha, kandi agana ku musozo, nagize iyerekwa muri jye. Nabonye isi imeze nk’umubumbe uko nari narayigishijwe, kandi ifashwe n’inkongi y’umuriro mu buryo yagurumanaga nk’umukenke wumye. Nabonye kandi abantu bahunga uwo muriro mu bwihebure bwinshi, ndetse nanjye nari muri bo. Ibirimi by’umuriro byari birebire cyane, ku buryo nabonaga bisa n’ibishaka kudusingira mu guhunga kwacu. Ariko imbere gato, mbona igiti cy’umusalaba muremure, kandi hirya yawo mbona intebe zo kuruhukiraho. Nuko mbona ko abageraga kuri uwo musalaba, babaga bahonotse iteka ry’uwo muriro wari wakongerejwe abanyabyaha, bagahita baruhukira ku ntebe zabateguriwe mu iteraniro rinini ry’abanezerewe kubwo kurokoka iryo teka.

Ndi muri iryo yerekwa, naremerewe n’umutwaro w’ibyaha byinshi bikorerwa mu isi, niba atari byose; ku buryo ntabashaga kwiruka neza, ndetse nibona bugufi cyane bwo gusingirwa n’ibyo birimi by’umuriro wakongoraga. Urubanza rw’abajura rwarantsinze, urw’abasambanyi, urw’abicanyi, urw’abakiranirwa mu buryo butari bumwe; mu yandi magambo, urubanza rw’abanzi b’Imana bose. Kuko ntari narigeze ngirirwa imbabazi, kuko ntari narigeze nozwa mu maraso ya Yesu ngo mwihe ambere Umwami n’Umukiza wanjye, ankize urubanza rwo kurimbuka (Yohana 3:16; Abaroma 8:1).

Nuko aho nari ndi niyumva ntaka cyane mu mutima nti:

- “Yesu: mbabarira.”

Byahuriranye nuko umwigisha yari arangije kwigisha, atangiye guhamagara abashaka kwikoreza Yesu imitwaro y’ibyaho byabo no kumwiha, ngo abone uburyo nawe abategekera ibyabo.

Nahagurutse mu ba mbere n’amarira menshi n’ikiniga, kandi nsiganwa nk’udashaka gucikirwa n’igihe cy’imbabazi; kuko nabonaga urugi rwenda gukingwa. Nuko baturarikira gutera intambwe imbere no gupfukama, abayobozi baratuzenguruka, baradusengera; badusabira imbabazi z’ibicumuro byacu ku Mana mu izina rya Yesu Kristo, kandi bararikira Yesu n’Umwuka Wera kuza kuba muri twe, no kubana natwe. Nuko numva amahoro menshi ntabasha kurondora yuzuye mu mutima wanjye, umutwaro w’ibyaha n’urubanza rwabyo binkurwaho rwose.

Hakurikiyeho akanya ko gusengera abafite ibibazo bibaremerereye, bashaka ko Yesu yagira icyo abikoraho; nasiganwe mu guhaguruka. Nuko nabwo baturarikira kuza gupfukama imbere. Twari iteraniro rinini ry’abanyabibazo rwose. Babwira buri wese gutakira Imana kurwe ruhande mu ijwi rigufi, maze nabo bazamura ijwi badusengera twese muri rusange. Aho nari mpfukamye, nabwiraga Imana nsubiramo n’ikiniga nti:

- “Ubwo ugenderera abandi Mana, nanjye ntunsige.”

Nuko ngiye kumva numva ibiganza by’umwe mu bayobozi binkoze ku mutwe, aransengera. Arimo arasenga yinjira mu Mwuka, avuga mu ndimi nyinshi, kandi arahanura mu magambo macye; ati:

“Uku niko Uwiteka abwira umwana we Abeli ati:
‘Ndakuzi; kandi nzagufasha.’”

Ngiryo ijwi numvise iryo joro. Natashye nezerewe mu mutima: nari nakuweho urubanza rw’ibyaha, niswe umwana w’Imana, kandi Imana ubwayo yasezeranye kuzamfasha. Ikindi cyajyaga kumpa umunezero usumbye uwo muri ibyo bihe ni ikihe? Ntacyo nabonaga rwose.

Kandi Imana yaramfashije; kuko ari iyo kwizerwa. Ubwayo yarihamije iti:

“Imana si umuntu ngo ibeshye,
kandi si umwana w’umuntu ngo yicuze.
Ibyo yavuze no gukora ntizabikora?
Ibyavuye mu kanwa kayo, no gusohoza ntizabisohoza?”
(Kubara 23:19)

Nyuma y’icyumweru kimwe neguriye Imana ibyanjye byose, wa mugenzuzi w’amashuri abanza yampamagariye kujya kwigisha mu kigo kimwe aho nasimburaga umwalimukazi wari ugiye mu kiruhuko cyo kubyara. Nahakoze ukwezi kumwe, maze irindi rembo ry’akazi ririkingura mu kigo cy’amashuri yisumbuye.

Kuva icyo gihe kugeza ubu, hatambutse byinshi; yewe n’ibihe bitari bike narwanyijwe n’isi mu ntambara zikomeye, ndetse bigera aho amazi yayo yenda kurenga ku bugingo bwanjye. Cyane ko hejuru yuko kuba mu isi ari nko gufata igihe ku rugamba (Yobu 7:1), kuyibamo ukurikira Yesu byo ntibyoroshye na gato (Matayo 7:14; Luka 21:17). Ariko muri byose, Yesu ntajya atererana abe; ibikomeye ajya abyoroshya (Yesaya 45:2).

Umwe niwe waririmbye avuga Yesu, ati:

“Nabonye umukunzi mwiza, byose arabishobora
Ajya andinda akaga kose, mu nzira ijya mu ijuru
Kumuhanga amaso iteka, bizankiza intege nke
Nshire ubwoba nshire ubute, nyuma nzatabaruka.”

Ntacyo mushinja Yesu, yarambabariye. Kandi muri byose urugamba rw’ubuzima rwancishijemo, yaramfashije; nubwo ngikeneye gufashwa nawe. Kuko nk’uko umuririmbyi yabivuze:

“Ndacyabona ibimbabaza,
haracyari ibindushya;
Nyamara ubwo turi kumwe,
nzi yuko ntacyo nzaba.”

Agana ku musozo w’urwandiko yandikiraga ab’itorero ngo rubabere inkomezi n’inyigisho hose byari kuzajya bikenerwa inzira imaze kuramba, hari aho Petero yagize ati:

“Burya ntitwakurikije imigani yahimbwe n’ubwenge ubwo twabamenyeshaga imbaraga z’Umwami wacu Yesu Kristo no kuzaza kwe; ahubwo twiboneye n’amaso yacu icyubahiro cye gikomeye.”
(2 Petero 1:16)

Petero ntiyavugaga Yesu yabwiwe cyangwa yasomye mu bitabo; yavugaga Yesu yabanye nawe, akamukoraho n’intoki ze. Hari uko yari yaramumenye, hari uko yari yaramubonye; uko ni nako yashakaga ko ab’itorero bamwimenyera.

Bizaba byiza kuri wowe ubwawe, niwigirira ubuhamya bw’ibyawe n’Imana, ukibonera imbaraga zayo zikomeye mu buzima bwawe. Bizagufasha mu minsi y’ubusuhuke bwawe kuri ino si y’imburabuturo, kuzagera kuri wa mugezi witwa Rupfu; uwambukane ibyiringiro, kandi usohore amahoro aho abacyuye igihe cyabo kuri runo rugerero bajya basohora.

Ubu buzima uko bukoze, mu rugendo rwabwo, hajya habaho iminsi myiza yo guseka no kunezerwa, umuntu akumva ko ari amahoro rwose; kandi agakunda ubuzima. Ariko kandi hajya habaho no kubabara no gusuhuza umutima; imbere ukabona umwijima gusa. Kandi dore ikibabaje cyane, bene iyo minsi y’umwijima niyo myinshi mu minsi yahawe umwana w’umuntu (Umubwiriza 11:8). Mu bimeze nk’ibyo, ubuhamya bwawe bwite bw’imbaraga za Yesu wiboneye nibwo bugukirisha, iminsi mibi igahita itaguhindanije; byanarimba ikagusigira ubuhamya buzavugwa n’ab’ibihe byawe, bukubaka ab’ibihe bizaza bazabwumva mu nyuma zawe.

Hari uko Petero yari yarabonye Yesu, hari uko yari amutunze muri we; kandi ibi yagize igihe cyo kubyaturisha akanwa ke, agira n’ibindi bihe byo kubihamirisha imibereho ye.

Ubwo Yesu yabazaga abigishwa be uko abantu bamutekereza, hatanzwe ibisubizo byinshi.

Bati:

- “Bamwe bagira ngo uri Eliya.”

Kandi bati:

- “Abandi bagira ngo uri Yeremiya.”

N’ibindi bisubizo bitandukanye, ndetse ndibwira bimwe bitabashije kwandikwa muri Bibiliya. Ariko byaje gukomera Yesu aberekejeho icyo kibazo! Ati:

“Ariko mwebweho mugira ngo ndi nde?”
(Matayo 16:15)

Nta kintu Bibiliya imbwira abandi bigishwa basubije kuri iki kibazo, keretse igisubizo cy’umuntu umwe gusa: Petero.

Ndibwira ko batashubije, kuko icyo kibazo cyabakomereye rwose.

Babonaga Yesu nk’umuyobozi w’itsinda ryabo, uwo bakurikiraga mu ngendo zitandukanye yagiraga yigisha; bakabona ibitangaza akora ntibabitindeho ngo bagire byinshi babyibazaho, nuko bukira bugacya. Bwari bwo buzima bwabo, uko abandi bantu babaho mu mirimo itandukanye bakora; ni bangahe muri bo bibaza k’ubayobora, cyangwa umuntu runaka bakorana? Ni bangahe bafata umwanya wo kwibaza ku muntu babana bati:

- “By’ukuri, uyu muntu ni muntu ki?”

Ahari Yesu ababajije icyo kibazo, niho nabo babaye nk’abakangutse; nibwo bibajije uwo muntu bakurikiye ari muntu ki.

Umuntu wagaburiraga abantu ibihumbi ibyo kurya bitahaza abantu mirongo (Luka 9:10-17; Jean 6:1-14)!

Umuntu wategekaga abadayimoni bakava muwo bari baribasiye (Mariko 5:1-20)!

Umuntu imiraba y’inyanja yumviraga, yayitegeka igatuza (Matayo 8:23-27; 14:23-33)!

Yewe n’imbaraga z’urupfu yari yarazikenetse; kuko yakizaga abarwayi (Matayo 8:1-15), akazura n’abapfuye (Mariko 5:35-42; Yohana 11:1-45).

Ntibajyaga guhita babona igisubizo ako kanya. Byakabaye ikizamini, baragitsinzwe rwose. Nibwo barebanyeho, nk’ababwiwe ururimi batumva, cyangwa ababajijwe ibibera mu gihugu cya kure batigeze banumva mu matwi yabo.

Ariko Petero, nta kujijinganya, aratura kandi arahamya ati:

“Uri Kristo, Umwana w’Imana nzima.”
(Matayo 16:16)

Kugira ngo agere kuri uku guhishurirwa no guhamya gukomeye gutyo, Petero yabanje kwitoza kumenya Yesu, no kumwizera. Ubwe yari yarabwiye abigishwa be bose ati:

“Ntimuhagarike imitima yanyu;
mwizera Imana, nanjye munyizere.”
(Yohana 14:1)

Ibyo Yesu yabibwiye abigishwa be bose, ndibwira nta n’umwe utari uhari. Ariko umuhanuzi Yesaya niwe wahanuye abaza ati:

“Ni nde wizeye ibyo twumvise?”
(Yesaya 53:1)

Petero yari yarabyumvise n’amatwi ye, abyongera kubyo yari yarabonye n’amaso ye, maze yiyemeza kubigerageza, no kubigira ibye.

Igihe kimwe rero, nyuma y’inyigisho zizana umunezero ku maso y’uwamenyereye umubabaro, nyuma y’ibitangaza byo gukira kw’abarwayi no guhazwa kw’abashonje, nyuma yo guhishurirwa ubuntu butangaje bagiriwe bwo kumva no gusobanukirwa ibyahishwe abanyabwenge n’abandi ibihumbi babyifuje ntibabishyikire, nyuma y’akazuba gasusurutsa ko muri ubu buzima, umugoroba w’isi urakuba; isaha y’umubi ibagwa gitumo. Nibwo bisanze bonyine mu nyanja kandi hagati mu mwijima w’ijoro, mu muraba mwinshi w’amazi yashakaga kurenga ku bugingo bwabo. Ariko by’ukuri ntibari bonyine, kuko Yesu atari yigeze abakuraho umutima we.

Mu rukerera, bageze aho intege zenda kubashirana, hamwe umuntu arekera aho gushwanya akihebera urwaje, Yesu aza abagana, agenda hejuru y’umuraba. Nibwo hejuru y’umutima uhagaze bazanirwagwa n’umuraba w’amazi hiyongereyeho ubwoba bw’umuzimu babonye, kuko kuri bo nta kindi uwo wazaga abagana yajyaga kuba cyo atari umuzimu. Mu buzima bwabo ntibari bakabone umuntu ugendesha ibirenge bye hejuru y’amazi, binongeye kandi mu muraba. Mu mwanya wabo, nanjye najyaga gukuka umutima rwose.

Maze uwo wari uje abagana arabahumuriza ati:

- “Mwigira ubwoba, ni jye.”

Ishusho basaga n’ababona bigoranye (kuko hari mu kabwibwi), yari iya Yesu; ijwi naryo bumvise, ryari irya Yesu rwose. Ariko se ibyo byajyaga kubizeza, hejuru y’ibidasanzwe bari bari kubona? Imitima yabo yari irengewe n’ubwoba, agahinda ari uko nta aho guhungira bafite. Ahari bamwe bari bugufi bwo kwiroha mu mazi, bashakisha cyose cyakiza ubugingo bwabo. Nta yindi nzira yari isigaye! Ubwato bwatereganwagwa n’amazi y’umuraba, kandi ntibwari bugishoboye kubahisha imbere y’igiteye ubwoba amaso yabo yiboneraga. Niba hariho inzira yo gukira yari isigaye, byari uguca muri uwo muraba.

Maze n’ubushizi bw’amanga, Petero arongera aratungurana; aravuga ati:

“Mwami niba ari wowe koko,
ntegeka nze aho uri ngenda hejuru y’amazi.”
(Matayo 14:28)

Maze Yesu aramusubiza ati:

“Ngwino.”

Nuko mu kwizera no kureba kuri Yesu, Petero asohoka mu bwato, agendesha amaguru hejuru y’amazi mu muraba mwinshi.

Mu mateka y’isi n’ay’inzira yo kwizera no kugendana n’Imana, abantu babiri kugeza ubu nibo bonyine bagendesheje amaguru yabo hejuru y’amazi: umwe ni Yesu, undi ni Petero. Urabona ibi bikomeye byigaragaje mu buzima bwa Petero uko byamukujije, mu kwizera akabinyuramo, bigasiga ubuhamya buvugwa mu moko yose no mu ndimi zose, na bugingo n’ubu nyuma y’imyaka irenga ibihumbi bibiri.

Imiraba izabaho mu buzima bwawe, uhitamo kwizera Imana cyangwa kutayizera, wakira Yesu mu bugingo bwawe cyangwa umuheza hanze. Imbere y’imiraba, itandukaniro hagati y’uwizera n’utizera, ni rinini.

Icya mbere, nuko uwo uhamagarirwa kwizera ari uwasuzuguye imiraba akayigenda hejuru (Matayo 14:23-33), ndetse akayitegeka gutuza ikamwumvira (Matayo 8:23-27). Kandi bifite impamvu: ni we nyir’imiraba (Yobu 38); mbese imiraba izabura kwumvira nyirayo?

Icya kabiri, nuko uwo uhamagarirwa kwizera yanesheje urupfu. Igitera ubwoba mu miraba y’ubu buzima, ni urupfu. Nyamara dore nta yindi nzira ihari: ku musozo w’ubu buzima, bose bagomba gupfa. None kuki abantu bakomeza gutinya gupfa, kandi ntacyo bashobora kubihinduraho? Urebye si urupfu batinya, ni aho rubashyikana batazi cyangwa batizeye.

Ku by’urupfu, abahisemo kwizera no kwiyegurira Imana muri Kristo Yesu bafite iri sezerano Yesu yabahaye:

“Kuko icyo Data ashaka ari iki,
ari ukugira ngo umuntu wese witegereza Umwana akamwizera,
ahabwe ubugingo buhoraho:
nanjye nzamuzure ku munsi w’imperuka.”
(Yohana 6:40)

Isezerano ryo kuzazuka, si iry’abizera Imana muri Kristo Yesu gusa; bose bazaba barapfuye ku munsi w’imperuka bazazuka.

Ariko Bibiliya itubwira neza ibizabaho ku munsi w’umuzuko.

“Bamwe bazakangukira ubugingo buhoraho,
abandi bazakangukira gukorwa n’isoni, no gusuzugurwa iteka ryose.”
(Danyeli 12:2)

Abo Yesu yamenye, azabishingira. Ntabwo azabazurira kubahemukira, cyangwa kubakoza isoni; azabazurira kubagirira neza.

Ubwe yabwiye abigishwa be ati:

“28. Nimwe mwihangananye nanjye mu byo nageragejwe byose;
29. Nanjye mbabikiye ubwami nk’uko Data yabumbikiye,
30. Kugira ngo muzarye munywe mwegereye ameza yanjye mu bwami bwanjye.” (Luka 22)

Umwe mu bamenye iyi nzira niwe waririmbye ngo:

“Ubwo Yesu ahari, nta bwoba mfite
Mumumbwirire ko nkiri mu nzira
Sinayivuyemo, sinayiretse
Ubwo Yesu ahari, ndaguma ngende.”

Kandi ati:

“Hirya y’izuba, hirya y’ukwezi
hirya y’inyenyeri
Nyir’icyo gihugu turaziranye
Ngiye gutura iwe.
Hirya y’izuba, hirya y’ukwezi
Hirya y’inyenyeri
Nzasangayo Yesu, nzakirwa neza,
Azambona amenye.”

Haba kurokoka umuraba, haba kurengerwa nawo, abizera bafite amahoro: hirya y’ubupfubyi, hirya y’ubupfakazi, hirya y’inzara no gukena, hirya y’uburwayi, hirya y’ubuhunzi, hirya yo kwangwa no gutotezwa, hirya y’ubugumba, hirya yo kuba mu nzu z’imbohe, hirya yo kwandagazwa no guteshwa agaciro kugeza aho kwizinukwa, hirya ….. hirya …...; muri macye:

“Hirya y’imiraba yose yo muri ubu buzima, hari igihugu abizera bazaboneramo byose byo kubibagiza imihati n’imiruho bagirira muri iyi Si (Ibyahishuwe 21:4), igihugu babikiwe na Yesu bizeye.” (Yohana 14:1; Luka 22:28-30)

Utaragera ku musozo w’uru rugendo ariko, mu makuba yo mu nzira, Imana yagusezeranije kugufasha nuyitakira (Yeremiya 33:3; Yesaya 30:19; 1 Petero 5:7).

Kandi:

“Ntutinye mukumbi muto,
iso wo mu ijuru yishimira kuguha ubwami.”
(Luka 12:32)

Nibyo! Iso wo mu ijuru, yishimira kuguha ubwami.

Kandi:

“Ibahamagara ni iyo kwizerwa,
no kubikora izabikora.”
(Abatesalonike 5:24)

Mbese ntiwayitaba, mu izina rya Yesu Kristo?